Соғлиқни сақлаш вазирининг 19.06.2025 йилдаги 3632-сон буйруғи билан Давлат бюджети маблағлари ҳисобидан имтиёзли тоифага кирувчи шахслар даволанадиган касалликлар рўйхати тасдиқланди.
Ҳужжат Президентнинг 05.09.2024 йилдаги "Давлат тиббий суғуртаси механизмларини жорий этишга оид чора-тадбирлар тўғрисида"ги ПҚ-311-сон қарорига мувофиқ ишлаб чиқилди.
Имтиёзли тоифадаги шахсларни даволаш врач кўрсатмаси бўйича "Электрон соғлиқни сақлаш" ахборот тизими орқали шаклланган йўналма асосида Давлат бюджети маблағлари ҳисобига бепул амалга оширилади.
Эслатиб ўтамиз, 2026 йил 1 январдан бошлаб давлат тиббий суғурта механизмлари жорий этилган вилоятларда туман (шаҳар) ва ҳудудий даражадаги тиббиёт муассасаларида электрон навбат асосида режали стационар тиббий ёрдамни бепул олиш ҳуқуқига эга бўладилар:
- ЖШДСни ёки ижтимоий солиқни тўловчилар;
- Солиқ кодексига мувофиқ меҳнат стажини ҳисоблаш учун зарур бўлган белгиланган солиқ миқдорларини тўлаган шахслар;
- вояга етмаганлар, таълим ташкилотларининг ўқувчи ва талабалари, ҳомиладор аёллар ва икки ёшгача бола парвариши билан банд шахслар, меҳнат органлари томонидан ишсиз сифатида расман рўйхатга олинган шахслар, давлат пенсиясини олувчилар ва "Ижтимоий ҳимоянинг ягона реестри" ахборот тизими орқали кам таъминланган деб тан олинган оилалар аъзолари ёки "Камбағал оилалар реестри" ахборот модули орқали камбағал деб тан олинган оилалар аъзолари.
Ҳужжат Қонун ҳужжатлари маълумотлари миллий базасида эълон қилинган ва 01.07.2025 йилдан кучга киради.
Лола Абдуазимова
