Вазирлар Маҳкамасининг 06.10.2022 йилдаги “Қурилиш coҳaсига оид талабларни соддалаштириш ҳамда техник жиҳатдан тартибга солиш соҳасидаги норматив ҳужжатларни тизимлаштириш чора-тадбирлари тўғрисида” 577-сон қарори қабул қилинди.
Ҳужжатга мувофиқ 2023 йилнинг 1 январидан:
- “Давлат харидлари тўғрисида”ги Қонун доирасида амалга ошириладиган қурилиш-монтаж, реконструкция ва мукаммал таъмирлаш ишларининг лойиҳа-смета ҳужжатларидаги қиймати смета-ресурс нормалари асосида шакллантирилади;
- қурилиш-монтаж, реконструкция ва мукаммал таъмирлаш ишларини ўз маблағлари ҳисобидан молиялаштираётган тадбиркорлик субъектлари учун смета-ресурс нормалари тавсиявий хусусиятга эга бўлади;
- қурилиш регламентлари ҳамда смета-ресурс нормалари техник жиҳатдан тартибга солиш соҳасидаги норматив ҳужжатлар жумласига кирмайди ҳамда уларни Адлия вазирлигида ҳуқуқий экспертизадан ўтказиш талаб этилмайди;
- шаҳарсозлик нормалари ва қоидалари (кейинги ўринларда – ШНҚ) ҳар 3-4 йилда қайта кўриб чиқилади ва заруратга кўра янгилаб борилади;
- қурилиш материаллари ва жиҳозларига оид стандартлар фақат қурилиш вазирлиги томонидан қабул қилинади;
- қуйидаги хорижий норматив ҳужжатлар асосида ишлаб чиқилган ҳамда хорижий давлатларда экспертизадан ўтказилган лойиҳаларнинг тегишли қисмлари Ўзбекистон Республикасида тўғридан-тўғри тан олинади ва ушбу қисмлар бўйича маҳаллий экспертиза органларидан экспертизадан ўтказилмайди:
|
Т/р |
Норматив ҳужжатлар номи |
|
1. |
Еврокодлар (European Codes, EС) |
|
2. |
Британия стандартлари (British Standards, ВS) |
|
3. |
Хитой миллий қурилиш стандартлари (GB, CJ, JC, JG ва бошқалар) |
|
4. |
Корея қурилиш кодлари (Korean building code, КВС) |
|
5. |
РФ Қурилиш меъёрлар ва қоидалар (СНиП) |
|
6. |
АҚШ халқаро қурилиш кодлари (International building code, IBC) |
|
7. |
Япония миллий стандартлари (Japanese Industrial Standards, JIS) |
Қурилиш вазирлигига “Қурилиш регламентлари” ва “Смета-ресурс нормалари”га ўзгартириш ва қўшимчалар киритиш, уларнинг янгиларини қабул қилиш ёки аҳамиятни йўқотганларини бекор қилиш ҳуқуқи берилмоқда.
Шунингдек ҳужжат билан қуйидагилар тасдиқланмоқда:
- 2023 йилда ўзаро умумлаштириладиган шаҳарсозлик нормалари ва қоидалари рўйхати (44 та ШНК 14 та ШНКга умумлаштирилади);
- 2023 йилда ўзаро бирлаштириладиган қурилиш ишлари учун “Смета-ресурс нормалари” тўпламлари рўйхати (35 та тўплам 16 тага бирлаштирилади);
- 2023 йил 1 январдан мажбурийлиги бекор қилинадиган ва “Қурилиш регламентлари” тоифасига ўтказиладиган 30 та ШНК рўйхати;
- 2023 йил 1 январдан мажбурийлиги бекор қилинадиган ва маълумотнома тоифасига ўтказиладиган 76 та ШНК рўйхати;
- 2023 йил 1 январдан мажбурийлиги бекор қилинадиган ва қурилиш ишлари учун “Смета-ресурс нормалари” тоифасига ўтказиладиган 46 та ШНК рўйхати;
- 2022-2024 йилларда Кореянинг “KICT” институти билан ҳамкорликда халқаро нормативлар билан уйғунлаштириладиган 122 та ШНК рўйхати.
Ҳужжат Қонун ҳужжатлари миллий базасида эълон қилинган ва 07.10.2022 йилда кучга кирди.
Собир Нурбердиев.
