Вазирлар Маҳкамасининг 2025 йил 24 октябрдаги 672-сонли қарори билан Ўзбекистон Республикаси Савдо-саноат палатаси ҳузуридаги Солиқ низолари бўйича эксперт кенгаши тўғрисидаги низом тасдиқланди.
Мазкур низом ССП ҳузуридаги Солиқ низолари бўйича эксперт кенгаши фаолиятини ташкил этиш тартибини, шунингдек тадбиркорлик субъектлари ва солиқ органлари ўртасида юзага келадиган солиқ низоларини кўриб чиқиш ҳамда улар бўйича хулосалар бериш тартибини белгилайди.
Асосий вазифалари қуйидагилардан иборат:
- тадбиркорлик субъектлари ва солиқ органлари ўртасида вужудга келган солиқ низоларини кўриб чиқиш ва улар юзасидан хулосалар чиқариш;
- солиқ қонунчилиги бўйича норматив-ҳуқуқий ҳужжатларни ва уларнинг амалда қўлланилишини ўрганиш, шунингдек ҳуқуқни қўллаш амалиёти сифатини ошириш бўйича таклифлар ишлаб чиқиш;
- солиқ низоларини кўриб чиқишда бизнес ҳамжамияти, давлат органлари ва ташкилотлари, шунингдек илмий муассасалар билан ҳамкорликни йўлга қўйиш.
Кенгаш солиқ низоларини кўриб чиқишда холислик, қонунийлик, адолатлилик ва ҳуқуқни қўллаш амалиётининг бир хиллигини таъминлайди.
Солиқ қонунчилигидаги барча келишмовчиликлар ва ноаниқликлар тадбиркор фойдасига талқин қилиниши лозим.
Солиқ низолари бўйича кенгашга мурожаат белгиланган шаклда амалга оширилади. Масалани ўрганиш натижаларига кўра, Кенгаш котиби мурожаат муаллифига мурожаатни Кенгаш мажлиси кун тартибига киритишнинг мақсадга мувофиқлиги тўғрисида асослантирилган ёзма жавоб юборади.
Котиб етти иш куни ичида Кенгаш раисининг ўринбосарлари билан келишган ҳолда Кенгаш мажлиси кун тартиби лойиҳасини тайёрлайди ва уни Кенгаш раисига тақдим этади.
Кенгаш мажлиси якунлангандан сўнг уч иш куни ичида тасдиқланган ҳисоботдан солиқ низосини кўриб чиқиш натижалари бўйича хулосани ўз ичига олган кўчирмалар Кенгаш аъзоларига, ариза берувчига ва бошқа манфаатдор ташкилотларга жўнатилади.
Кенгаш хулосалари ваколатли орган томонидан кўриб чиқилади ва кўриб чиқиш натижалари бўйича қарор қабул қилингандан сўнг 3 иш куни ичида Кенгашга маълумот тақдим этилади.
Кенгаш таркиби Президент қарори билан тасдиқланади. Кенгаш мажлислари ойига камида икки марта ўтказилади.
Ҳужжат Қонун ҳужжатлари миллий маълумотлар базасида давлат тилида эълон қилинган ва 2025 йил 25 октябрдан кучга кирган.
Лола Абдуазимова
