Вазирлар Маҳкамасининг 11.02.2025 йилдаги 78-сон қарори билан Ўқувчиларни касб-ҳунарга ўқитишда умумий ўрта таълим муассасалари ва тадбиркорлик субъектларининг ўзаро ҳамкорлик қилиш тартиби тўғрисидаги низом тасдиқланди.
Низомда умумий ўрта таълим муассасалари ва тадбиркорларнинг ҳамкорлик йўналишлари белгиланган. У шунингдек қуйидагиларни белгилайди:
- умумий ўрта таълим муассасалари ўқувчиларига касбий таълим беришни ташкил этиш тартиби;
- тадбиркорлар томонидан мактабларда касбий тўгаракларни ташкил этиш асослари;
- умумий ўрта таълим муассасаларининг бўш турган биноларини тадбиркорларга ижарага беришда умумий ўрта таълим муассасалари ва тадбиркорларнинг мажбуриятлари.
Касбий тўгараклар машғулотларига тадбиркорлик фаолияти билан қизиқувчи 7–11-синф ўқувчилари жалб этилади.
Мактабгача ва мактаб таълими вазирлиги ССП билан биргаликда 2025 йилдан бошлаб ўқувчиларни қобилияти ва қизиқишларига мос касбларга йўналтириш, шунингдек уларни замонавий касблар билан таништириш мақсадида 8-синф ўқувчиларининг саноат, ишлаб чиқариш, хизмат кўрсатиш, агротехника соҳасидаги корхона ва ташкилотларга экскурсияларини ташкил этади.
2024/2025 ўқув йили охиригача мактаб битирувчилари учун улар танлаган касблар бўйича амалий имтиҳонлар жорий этилади ва электрон сертификатлар берилади.
Тадбиркорларни касбий таълимга жалб этиш 2025/2026 ўқув йилида Сирдарё, Хоразм вилоятлари ва Тошкент шаҳрида тажриба тариқасида жорий этилади.
Ҳужжат Қонун ҳужжатлари маълумотлари миллий базасида эълон қилинган ва 12.02.2025 йилдан кучга кирди.
Лола Абдуазимова
