Танлов савдолари ғолиби фойда ва ҚҚСга эга бўлади

Солиқ солишнинг соддалаштирилган тартибини қўллайдиган юридик шахслар учун айрим умумбелгиланган солиқларни тўлаш бўйича мажбуриятлар сақланиб қолинади (СКнинг 349-моддаси). Тўлов манбаида ундириладиган фойда солиғи, Ўзбекистон Республикаси норезидентлари томонидан бажариладиган ишлар (хизматлар) бўйича ҚҚС, акциз солиғи тўланадиган маҳсулотлар ишлаб чиқаришда акциз солиғи, ЯИТ ва бошқалар.

СКнинг 349-моддасига киритилган қўшимчалар солиқ солишнинг қандай тизими қўлланилишидан қатъи назар молиялаштирилиши марказлаштирилган манбалар (Давлат бюджети ва мақсадли жамғармалар, хорижий тижорат банклари маблағлари) ҳисобига амалга ошириладиган объектларнинг капитал қурилишида танлов савдолари тендерида ғолиб бўлган иштирокчилар томонидан ҚҚС мажбурий тўланишини назарда тутади.

Ушбу тартиб 2017 йилнинг 1 апрелидан амалга киритилади.

Мазкур ҳужжатнинг тўлиқ матни билан, у билан боғланган бошқа қонун ҳужжатларига шарҳлар ва ҳаволалар билан яқин кунларда «Ўзбекистон Республикаси қонунчилиги» ахборот-қидирув тизимида танишиш мумкин. 

Музаффар Мирзағаниев,
экспертимиз.