Вазирлар Маҳкамасининг қарори билан Декларант ёки божхона брокери томонидан товарларнинг божхона қийматини аниқлаш имкони бўлмаган тақдирда, шартли божхона қийматини белгилаш орқали товарларни чиқариб юбориш тартиби тўғрисидаги низом тасдиқланди (24.11.2021 йилдаги 712-сон ВМҚ).
Ҳужжат Божхона кодексининг 321-моддасига мувофиқ қабул қилинган.
Низомга мувофиқ товарларнинг божхона қийматини аниқлаш имкони бўлмаганда уларни шартли чиқариб юбориш декларант томонидан такдим этилган БЮД асосида божхона органи томонидан амалга оширилади. Бунда божхона органи мазкур Низомда белгиланган тартибда товарларнинг шартли божхона қийматини мустақил равишда белгилайди.
Товарнинг шартли божхона қиймати декларант ёки божхона брокери билан маслаҳатлашувлар ўтказилгандан сўнг уларнинг аризасига мувофиқ аниқланади.
Божхона органи товарнинг шартли белгиланган божхона қиймати ва божхона тўловлари тўланишини таъминлаш миқдори ҳақида декларантга ёки божхона брокерига ёзма ёки электрон шаклда хабар қилади.
Маълумот учун! Маълум қилинган божхона қиймати - шартли божхона қиймати белгиланганда, БЮДни тўлдириш учун асос бўладиган, декларант томонидан тақдим этилган ва вақтинча қабул қилинган нарх.
Декларант томонидан маълум қилинган божхона қийматини тасдиқловчи ҳужжатлар тақдим этилгандан кейин божхона қиймати ва тегишли божхона тўловлари БЮДга тузатиш шаклини расмийлаштириш орқали қайтадан ҳисоб-китоб қилинади.
Шартли божхона қийматини қўллаш муддати БЮД рўйхатга олинган кундан эътиборан 60 календарь кунни ташкил этади.
Товарларнинг божхона қийматини тасдиқловчи ҳужжатлар тақдим этилмаган тақдирда, божхона тўловлари тўланишини таъминлаш суммаси белгиланган муддат ўтгач, Давлат бюджетига ўтказилади.
Шартли божхона қийматини белгилаш орқали товарларни чиқариб юбориш декларант ёки божхона брокери хоҳишига кўра куйидаги ҳолларда амалга оширилиши мумкин:
- товар-хомашё биржаларининг хориждаги савдо майдончаларида тузилган битимлари бўйича товарларнинг якуний нархи аниқ бўлмаганда;
- шартнома ўзаро боғлиқ шахслар ўртасида тузилганлиги тўғрисидаги белгилар мавжуд бўлган тақдирда;
- “Хавфни бошқариш” ААТ маълумотларига кўра товарнинг маълум қилинган божхона қиймати бўйича хавф аниқланганда ва бошқалар.
Ҳужжат Қонун ҳужжатлари маълумотлари миллий базасида эълон қилинган ва 25.02.2022 йилдан кучга киради.
Наргиза Воҳидова.
