Вазирлар Маҳкамасининг 3.02.2021 йилдаги «Давлат ўрмон фонди участкаларини ижарага бериш тартиби тўғрисидаги низомга (13.12.2019 йилдаги 993-сон ВМҚ билан тасдиқланган) ўзгартириш ва қўшимчалар киритиш ҳақида»ги 50-сон қарори қабул қилинди.
Биринчидан, ўрмон фондининг фойдаланилаётган, шу жумладан фойдаланилмаётган ерларини ижарага бериш ҳуқуқи аукцион орқали амалга оширилади. Бунда қўшимча киритилишича, ушбу ерлар жисмоний ва юридик шахсларга инвестиция шартномаси ёки ДХШ асосида 3 йилдан кам бўлмаган ва 49 йилдан ошмайдиган муддатга ижарага берилиши мумкин.
Иккинчидан, энди ўрмон фонди ерларининг ижара шартномалари қабул қилинган намунавий шартномага мувофиқ тузилади.
Учинчидан, ижара тўловининг ставкаси ўрмон фонди участкасининг 1 гектари учун 10 БҲМни ташкил этади (илгари – энг кам ставка 20 БҲМни ташкил этган).
Тўртинчидан, ижара тўловидан тушадиган маблағларнинг алоҳида ҳисоби юритилади ҳамда улар ўрмонзорлар барпо этиш тадбирларига йўналтирилади.
Ушбу қарор 29.09.2020 йилдаги «Қишлоқ хўжалиги учун мўлжалланган ерлардан ва ўрмон фонди ерларидан фойдаланиш самарадорлигини ошириш мақсадида Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги ЎРҚ-639-сон Қонунга мувофиқ қабул қилинган.
Бошқа ўзгартириш ва қўшимчалар ҳам киритилган.
Ҳужжат Қонун ҳужжатлари маълумотлари миллий базасида эълон қилинган ва 4.02.2021 йилдан кучга кирди.
Наргиза Воҳидова.
