Вазирлар Маҳкамасининг 10.11.2017 йилдаги 901-сон “Ўзбекистон Республикаси Адлия вазирлигининг Тошкент юридик коллежида ўқув-тарбия жараёнини ташкил этиш ва унинг мазмунини тубдан такомиллаштириш чора-тадбирлари тўғрисида”ги қарори қабул қилинди.
Ҳужжат юридик коллежни Тошкент давлат юридик университети тузилмасига ўтказишни кўзда тутади. Бундан ташқари, ўқув юрти фаолиятини тубдан яхшилаш учун қатор чора-тадбирлар қабул қилинди.
Коллеж фаолиятини ўрганиш ва уни такомиллаштириш бўйича комиссия ташкил этилди
Унинг таркибига Тошкент давлат юридик университети (ТДЮУ) ректори бошчилигида Ўрта махсус, касб-хунар таълими маркази, Адлия вазирлиги, Президент девони вакиллари ва бошқалар киради.
Ноябрь ойида комиссия раҳбар ва педагог кадрларни аттестациядан ўтказади. Аттестациядан ўтмаганлар ишдан озод этилади ва уларнинг ўрнига бошқа юксак малакага эга кадрлар қабул қилинади.
Коллежда ўқув жараёнини яхшилаш бўйича Тадбирлар режаси тасдиқланди
Унда қуйидагилар кўзда тутилади:
- 2017/2018 ўқув йилининг II семестридан бошлаб Коллеж ўқувчиларининг билимини баҳолаш тўғрисидаги низомни жорий этиш;
- ТДЮУ бюджетдан ташқари маблағлари ҳисобидан (фақат ўқитишнинг базавий қиймати миқдоридан ошадиган қисмида тўлов- контракт асосида ўқишдан тушадиган тушумлардан) коллеж ўқувчиларини моддий қўллаб-қувватлаш;
- белгиланган тартиб билан бир қаторда ўқув интизоми ва коллеж ички тартиб-қоидаларини бузганлиги, шу жумладан семестр давомида узрсиз сабабларга кўра дарсларни 74 соатдан ортиқ вақт қолдиргани, шунингдек, одоб-ахлоқ қоидаларини бузганлиги учун ҳам коллеждан четлаштириш. Юридик коллеж одоб-ахлоқ қоидалари шу ой ичида ишлаб чиқилади ва тасдиқланади;
- ўқувчиларнинг электрон ўқув ресурсларидан онлайн режимида фойдаланиши ва коллеж фаолияти ҳақида жамоатчиликни хабардор қилиш мақсадида коллежнинг замонавий веб-сайтини ва ижтимоий тармоқларда саҳифасини яратиш.
Кадрлар масалалари тартибга солинди
2018 йилнинг бошидан бошлаб “юриспруденция” тайёргарлик йўналиши бўйича янги мутахассисликлар ва касбларнинг очилиши муносабати билан коллежнинг штат жадвали қайта кўриб чиқилади.
ТДЮУ бюджетдан ташқари маблағлари (тўлов-контракт маблағлари) ҳисобидан ходимларга тариф ставкасининг 100%игача миқдорда ҳар ойлик устамалар белгиланади.
Меҳнат вазирлиги ўрта махсус юридик маълумот бўлишини талаб этадиган мутахассисликлар рўйхатини кенгайтириш мақсадида йил охиригача Асосий хизматчилар лавозимлари ва ишчи касбларининг классификаторини қайта кўриб чиқади.
Ҳужжат Қонун ҳужжатлари маълумотлари миллий базасида расман эълон қилинган ва 14.11.2017 йилда кучга кирди.
Мазкур ҳужжатнинг матни билан, у билан боғланган бошқа қонун ҳужжатларига шарҳлар ва ҳаволалар билан «Ўзбекистон Республикаси қонунчилиги» ахборот-қидирув тизимида танишиш мумкин.
Ленара Хикматова.
