Yangi viza, turistik yigʻim hisobini yuritishning yagona tizimi va chegaradan tezkor oʻtish mexanizmi (19.06.2020 yildagi PQ-4755-son qarorga qarang).
Endi 2021 yil 1 yanvardan joriy etiladigan oʻzgartirishlar haqida batafsil toʻxtalib oʻtamiz.
1. «Uzbekistan – my second home» («Oʻzbekiston – mening ikkinchi uyim») immigratsiya vizasining yangi turi. Maqsad – mamlakatimizning jadal ijtimoiy-iqtisodiy rivojlanishi uchun zarur boʻlgan salmoqli kapital, yuqori akademik bilimlar yoki oʻziga xos koʻnikmalarga ega shaxslarni Oʻzbekistonda doimiy istiqomat qilishga jalb etish.
2. Joylashtirish vositalarining bandligini monitoring qilish va turistik yigʻimlarni toʻliq tushumi ustidan kameral nazoratni amalga oshirish uchun Turistik yigʻim hisobini yuritishning yagona tizimi tashkil etiladi. U xorijiy fuqarolar va fuqaroligi boʻlmagan shaxslarning mamlakat hududida boʻlishini nazorat qilish imkoniyatini yaratadi.
3. «Gʻishtkoʻprik» (Toshkent viloyati) va «Xayraton» (Surxondaryo viloyati) xalqaro nazorat oʻtkazish punktlarida «Fast track» xizmati – chegaradan tezkor oʻtish mexanizmi joriy etiladi. Xususan, quyidagilarni tashkil etish nazarda tutilgan:
- avtotransport vositalarida chegarani kesib oʻtayotgan jismoniy shaxslarning navbatdan tashqari pasport va bojxona nazorati jarayonlarini tezlashtirgan tartibga amalga oshirish uchun alohida yoʻlak;
- jismoniy shaxslarning dam olishi va hordiq chiqarishi uchun shart-sharoitlar, shu jumladan onalar va bolalar xonalari, ovqatlanish shoxobchalari hamda tijorat banklari filiallarini tashkil etish va valyuta ayirboshlash uchun bankomatlar oʻrnatgan holda VIP-zallar.
«Fast track» xizmati pullik asosda, chegarani kesib oʻtishdan oldin 90 kun mobaynida oldindan toʻlov qilish yoki mobil ilovalar orqali toʻlash imkoniyatini yaratgan holda amalga oshiriladi.
Boshqa xalqaro nazorat-oʻtkazish punktlarida «Fast track» xizmati ularning oʻtkazish oqimini hisobga olgan holda Vazirlar Mahkamasi tomonidan tasdiqlanadigan grafik asosida joriy etiladi.
Hujjat Qonun hujjatlari ma’lumotlari milliy bazasida e’lon qilingan va 20.06.2020 yildan kuchga kirdi.
Elmira Siraziyeva.
