Bosh prokuratura huzuridagi Agrosanoat majmui va oziq-ovqat хavfsizligi ta’minlanishi ustidan nazorat qilish inspeksiyasi (bundan keyin – Inspeksiya) biznesni 30 kungacha tekshirish huquqiga ega boʻldi (30.09.2018 yildagi PF–5547-son Farmon).
Idora vakolatiga kiradigan barcha masalalar yuzasidan tekshiruvlar oʻtkazilishi mumkin. Eslatib oʻtamiz, Inspeksiya 11 ta yoʻnalishda faoliyat olib boradi va 84 ta funksiyani bajaradi, ularning aksariyati – nazorat funksiyalari. Masalan, qonun hujjatlari talablariga muvofiq barcha tashkilotlarda qishloq хoʻjaligi tovarlarini ishlab chiqarish, olib kirish, saqlash va sotish ustidan nazoratni amalga oshirish (Inspeksiya toʻgʻrisidagi nizomga qarang).
Bunda tekshiruvlar bildirish tartibida, ya’ni prokuratura organlari bilan oldindan kelishilmay oʻtkaziladi. Prezidentning 27.07.2018 yildagi «Tadbirkorlik sub’yektlarining huquqlari va qonuniy manfaatlarini himoya qilish tizimini yanada takomillashtirish chora-tadbirlari toʻgʻrisida»gi PF–5490-son Farmoniga tegishli oʻzgartirishlar kiritildi.
Hujjat Qonun hujjatlari ma’lumotlari milliy bazasida e’lon qilingan va 1.10.2018 yildan kuchga kirdi.
Samir Latipov.
