Bir yilgacha stajda «dekret puli» miqdori – 75%

Prezidentning 27.12.2016 yildagi PQ–2699-son qaroriga ishlangan davrga bogʻliq holda homiladorlik va tugʻish boʻyicha nafaqalar miqdoriga taalluqli oʻzgartirishlar kiritildi. Tuzatishlar Prezidentning 4.04.2018 yildagi PF–5398-son Farmoni bilan kiritilgan va 5.04.2018 yilda kuchga kirdi.  

Eslatib oʻtamiz. Homiladorlik va tugʻish boʻyicha nafaqa miqdori ayol ishga qabul qilingan kundan boshlab amalda ishlangan vaqtiga qarab tabaqalashtirilgan:

• 6 oygacha – oʻrtacha oylik ish haqining 50%i;
• 6 dan 12 oygacha – 75%i;
• 12 oydan ortiq – 100%i.

Endi esa 6 oygacha boʻlgan ish stajida nafaqalarni toʻlash tartibi bekor qilindi va ishga qabul qilingan kundan boshlab 12 oydan kam ish staji boʻlganda nafaqaning yagona miqdori belgilandi  – 75% (quyidagi jadvalga qarang). Ya’ni, agar ayol, olaylik, atigi 5 oy ishlab «dekret ta’tili»ga chiqqan boʻlsa, uning nafaqasi miqdori  ilgarigidek 50% emas, balki 75%ni tashkil etadi.    

Tahririyatdan: qonunchilikning mazkur normasini amalda roʻyobga chiqarishda amaliyotda muammolar kelib chiqadi. Ularning ba’zilari bilan – bu yerda va bu yerda batafsil tanishish mumkin. 

Mazkur hujjatning toʻliq matni, sharhlar va u bilan bogʻliq boshqa qonun hujjatlariga havolalar bilan «Oʻzbekiston Respublikasi qonun hujjatlari» aхborot-qidiruv tizimida tanishish mumkin.

Lenara Xikmatova.