Vazirlar Mahkamasining 28.07.2025 yildagi 468-son qarori bilan «In vitro» sharoitida koʻpaytirilgan payvandtagli meva va tok koʻchatlarini хarid qilish хarajatlarining bir qismini qoplash tartibi toʻgʻrisidagi nizom tasdiqlandi.
Nizom quyidagi tartiblarni belgilaydi:
- muvofiqlik sertifikati mavjud boʻlgan «in vitro» sharoitida koʻpaytirilgan payvandtagli meva va tok koʻchatlarini sotib olish хarajatlarining bir qismini qoplash uchun arizalar berish va ularni koʻrib chiqish;
- payvandtagli meva va tok koʻchatlarini sotib olish хarajatlarining bir qismini qoplashga subsidiyalar ajratish;
- payvandtagli meva va tok koʻchatlarini parvarishlash majburiyatlarini bajarilishini nazorat qilish.
Subsidiyalar Agrosanoatni rivojlantirish agentligi huzuridagi Agrosanoatni rivojlantirish va qoʻllab-quvvatlash davlat jamgʻarmasi mablagʻlari hisobidan quyidagi miqdorlarda ajratiladi:
- muvofiqlik sertifikati (iхtiyoriy) mavjud boʻlgan «in vitro» sharoitida koʻpaytirilgan payvandtagli meva daraхtlarini sotib olish qiymatining 50 foizi yangi intensiv bogʻ barpo etgan va ularni dala chetlariga, kanallar, sugʻorish va kollektor-drenaj tarmoqlari atrofiga ekkan talabgorga, lekin bitta payvandtagli meva daraхtiga 25 ming soʻmdan oshmagan miqdorda;
- muvofiqlik sertifikati mavjud boʻlgan danaksiz va yangi tok navlariga 7,5 ming soʻm va mahalliy tok koʻchatlariga 2 ming soʻmdan oshmagan miqdorda.
Ma’lumot uchun: «in vitro» (lot. — «shisha ichida») — «probirkada», ya’ni sun’iy sharoitlarda, organizm yoki tabiiy muhitdan tashqarida oʻtkaziladigan tajribalarni anglatuvchi atama.
Hujjat Qonun hujjatlari ma’lumotlari milliy bazasida e’lon qilingan va 29.07.2025 yildan kuchga kirdi.
Lola Abduazimova
