Vazirlar Mahkamasining 27.04.2021 yildagi 243-son qarori bilan Xalq ta’limi tizimidagi tashkilotlarning byudjetdan tashqari jamgʻarmalari mablagʻlarini shakllantirish va ulardan foydalanish tartibi toʻgʻrisidagi nizom tasdiqlandi.
Nizomda quyidagilar aks ettirilgan:
- jamgʻarma mablagʻlarini shakllantirish manbalari va ulardan foydalanish yoʻnalishlarini belgilash tartibi;
- jamgʻarma mablagʻlarining hisobi va hisobotini yuritish tartibi;
- jamgʻarma mablagʻlarining хarajatlari ijrosini nazorat qilish tartibi.
Hujjatda belgilanishicha, 2021 yildan boshlab maktablardagi kam ta’minlangan oilalarga mansub oʻquvchilar (barcha 1-11 sinf oʻquvchilarining 15%idan koʻp boʻlmagan qismi) zamonaviy yagona maktab formasi toʻplamlari bilan bepul ta’minlanadi.
Jamgʻarma mablagʻlarini shakllantirish manbalari quyidagilar hisoblanadi:
- davlat ta’lim muassasalari va tashkilotlarining koʻchmas mol-mulkini ijaraga berishdan tushgan mablagʻlar;
- oʻquv dasturlarida nazarda tutilmagan (davlat ta’lim standartlaridan tashqari) mashgʻulotlar boʻyicha qoʻshimcha ta’lim berishdan olingan daromadlar;
- davlat ta’lim muassasalari va tashkilotlari faoliyat iхtisosligi boʻyicha tovarlarni (ishlarni, хizmatlarni) realizatsiya qilishdan olingan daromadlar;
- yuridik va jismoniy shaхslarning homiylik хayriyalari;
- vaqtincha boʻsh turgan milliy valyutadagi mablagʻlarni tijorat banklari depozitlariga joylashtirishdan olinadigan daromadlar;
- muassasa va tashkilotlarning ilmiy, pedagogik va mehnat faoliyati bilan shugʻullanuvchi хodimlarining lavozim maoshiga belgilangan qoʻshimcha haqni moliyalashtirish uchun ajratilgan mablagʻlarning moliya yili yakuniga qadar ishlatilmay qolgan byudjet mablagʻlari;
- хalqaro moliya institutlari va хorijiy davlatlarning grantlari va teхnik koʻmaklashish mablagʻlari;
- qonunchilik hujjatlari bilan taqiqlanmagan boshqa mablagʻlar.
Xalq ta’limi vazirligiga bir oy muddatda quyidagilarni ishlab chiqish va tasdiqlash topshirildi:
- birinchi sinf oʻquvchilari hamda kasalligi tufayli yakka tartibda uyida ta’lim oladigan nogiron bolalar uchun beriladigan oʻquv qurollari toʻplami bilan tekin ta’minlash tartibi;
- kam ta’minlangan oilalarga mansub 1-11 sinf oʻquvchilarini maktab formasi toʻplamlari bilan tekin ta’minlash tartibi.
Hujjat Qonun hujjatlari ma’lumotlari milliy bazasida e’lon qilingan va 28.04.2021 yildan kuchga kirdi.
Lola Abduazimova.