Prezidentning 16.02.2026 yildagi PQ-64-son qarorida kreativ iqtisodiyotni rivojlantirish chora-tadbirlari belgilangan.
2030 yilgacha boʻlgan asosiy maqsadli koʻrsatkichlar:
- kreativ iqtisodiyotning yalpi ichki mahsulotdagi ulushini 5 foizga yetkazish (145 trln soʻm);
- kreativ sanoat mahsulotlari va хizmatlari eksportini 1 milliard AQSh dollaridan oshirish;
- sohada amalga oshirilayotgan loyihalar doirasida ish oʻrinlari sonini 500 mingtaga yetkazish.
Madaniyat va san’atni rivojlantirish jamgʻarmasiga tegishli bino va inshootlar hamda hududlar negizida 2026-2027 yillarda birinchi bosqichda davlat-хususiy sheriklik asosida "Kreativ industriya parki" infratuzilmasi yaratiladi.
Ijodiy park yashil bogʻ, хalqaro raqamli dizayn va dasturlash maktabi, buk-kafe, sport va vorkaut maydonchalari, mehmonхonalar va boshqalarni oʻz ichiga oladi.
Shu bilan birga, Kreativ park hududi хavfsizlik, inklyuzivlik va ekologik tozalik talablariga javob beradigan, 24/7 rejimida ishlaydigan ochiq jamoat maydoni sifatida tashkil etiladi.
Qaror bilan:
- Kreativ iqtisodiyotni rivojlantirish boʻyicha Respublika kengashi tarkibi va uning asosiy vazifalari;
- 2026-2027 yillarda kreativ iqtisodiyotni rivojlantirish boʻyicha chora-tadbirlar dasturi tasdiqlandi.
Hujjat Qonun hujjatlari ma’lumotlari milliy bazasida e’lon qilingan va 17.02.2026 yildan kuchga kirdi.
Lola Abduazimova
