Президентнинг 16.02.2026 йилдаги ПҚ-64-сон қарорида креатив иқтисодиётни ривожлантириш чора-тадбирлари белгиланган.
2030 йилгача бўлган асосий мақсадли кўрсаткичлар:
- креатив иқтисодиётнинг ялпи ички маҳсулотдаги улушини 5 фоизга етказиш (145 трлн сўм);
- креатив саноат маҳсулотлари ва хизматлари экспортини 1 миллиард АҚШ долларидан ошириш;
- соҳада амалга оширилаётган лойиҳалар доирасида иш ўринлари сонини 500 мингтага етказиш.
Маданият ва санъатни ривожлантириш жамғармасига тегишли бино ва иншоотлар ҳамда ҳудудлар негизида 2026-2027 йилларда биринчи босқичда давлат-хусусий шериклик асосида "Креатив индустрия парки" инфратузилмаси яратилади.
Ижодий парк яшил боғ, халқаро рақамли дизайн ва дастурлаш мактаби, бук-кафе, спорт ва воркаут майдончалари, меҳмонхоналар ва бошқаларни ўз ичига олади.
Шу билан бирга, Креатив парк ҳудуди хавфсизлик, инклюзивлик ва экологик тозалик талабларига жавоб берадиган, 24/7 режимида ишлайдиган очиқ жамоат майдони сифатида ташкил этилади.
Қарор билан:
- Креатив иқтисодиётни ривожлантириш бўйича Республика кенгаши таркиби ва унинг асосий вазифалари;
- 2026-2027 йилларда креатив иқтисодиётни ривожлантириш бўйича чора-тадбирлар дастури тасдиқланди.
Ҳужжат Қонун ҳужжатлари маълумотлари миллий базасида эълон қилинган ва 17.02.2026 йилдан кучга кирди.
Лола Абдуазимова
