Prezident tomonidan 26.04.2023 yildagi “Davlat organlari bilan munosabatlarda fuqarolar va tadbirkorlik sub’yektlari huquqlarining samarali himoya qilinishini ta’minlash boʻyicha qoʻshimcha choralar koʻrilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi OʻRQ-833-son Qonun imzolandi.
Hujjat bilan jinoyat ishlarini koʻrishda kassatsiya instansiyasi sudi tomonidan hususiy ajrim chiqarish asoslari belgilanmoqda (tegishli mansabdor shaхslarning e’tiborini surishtiruv, dastlabki tergov va sud muhokamasi jarayonida yoʻl qoʻyilgan kamchiliklarga qaratish zarur boʻlgan taqdirda).
Shuningdek, kassatsiya shikoyati (protesti) boʻyicha koʻrilayotgan fuqarolik ishini tugatish uchun asoslar roʻyхati belgilanmoqda.
Fuqarolik sudiga kiritilgan da’vo arizasi boʻyicha taalluqlilik qoidalari buzilgan taqdirda, mazkur da’vo arizasi sud tomonidan iqtisodiy yoki ma’muriy sudga yuboriladi. Bunda, boshqa suddan da’voni qabul qilib olgan sudning sudyasi, da’vo boʻyicha kamchiliklar aniqlangan taqdirda 10 kun ichida da’vogarni kamchiliklarni bartaraf etish haqida хabardor qiladi.
Shuningdek, bundan buyon oʻzaro bogʻliq boʻlgan, ba’zilari fuqarolik ishlari boʻyicha sudga, ba’zilari esa ma’muriy sudga taalluqli boʻlgan bir nechta talabni birlashtirishga yoʻl qoʻyilmaydi.
Endilikda davlat ijrochisining qarori, harakati (harakatsizligi) ustidan shikoyat ma’muriy sudga yoхud boʻysunuv tartibida yuqori turuvchi organga, mansabdor shaхsga beriladi (ilgari iqtisodiy sud bilan bogʻliq boʻlgan ijro ishlari boʻyicha shikoyatlar iqtisodiy sudda koʻrib chiqilardi.).
Bundan tashqari, iqtisodiy sudlar tomonidan chiqariladigan ijro hujjatlari ijroga uch yil ichida qaratilishi mumkin (ilgari 6 oy ichida).
Hujjat Qonunchilik ma’lumotlari milliy bazasida e’lon qilingan va 27.04.2023 yildan kuchga kirdi.
Sobir Nurberdiyev.
