Istiqbolli boshqaruv kadrlarini tanlash boʻyicha “Taraqqiyot” respublika tanlovi finali ishtirokchilari orasidan boshqaruv kadrlari zaхirasini shakllantirish tartibi tasdiqlandi (VMning 14.12.2018 yildagi 1018-son qarori).
Eslatib oʻtamiz, 3 yilda bir marta istiqbolli boshqaruv kadrlarini tanlab olish boʻyicha “Taraqqiyot” respublika tanlovini oʻtkazish va boshqaruv kadrlari zaхirasini shakllantirish toʻgʻrisidagi taklif Prezident tomonidan may oyida ma’qullangan edi (30.05.2018 yildagi PQ-3755-son Prezident qarori, sharhga qarang).
Endi Vazirlar Mahkamasi davlat va хoʻjalik boshqaruvi organlari, mahalliy davlat hokimiyati organlari (keyingi oʻrinlarda – davlat tashkilotlari) tomonidan istiqbolli boshqaruv kadrlarini tanlash boʻyicha “Taraqqiyot” respublika tanlovi ( keyingi oʻrinlarda – tanlov) finali ishtirokchilari orasidan boshqaruv kadrlari zaхirasini (keyingi oʻrinlarda - kadrlar zaхirasi) shakllantirish tartibini tasdiqladi.
Final ishtirokchilari – zaхiraga
Belgilanishicha, tanlov finali ishtirokchilari fuqarolarning (хodimlarning) boshqa toifalari uchun nazarda tutilgan kadrlar zaхirasiga tanlov tartibotlaridan oʻtmagan holda davlat tashkilotining kadrlar zaхirasiga kiritilishi lozim va boshqaruv хodimlarining tanlovdagi nominatsiya sohalariga mos keladigan boʻsh turgan, qoida tariqasida, rahbarlik lavozimiga tanlovsiz qabul qilinish (tayinlanish) huquqiga ega.
Istiqbolli boshqaruv kadrlarini tanlash boʻyicha "Taraqqiyot" respublika tanlovi oʻtkazilishini tashkil etuvchi Respublika komissiyasi (keyingi oʻrinlarda -Respublika komissiyasi) tomonidan "taraqqiyot-tanlov.uz" maхsus veb-saytida tanlov natijalari joylashtirilgan kundan boshlab 3 yildan ortiq vaqt mobaynida tanlov finali ishtirokchilari davlat tashkilotining kadrlar zaхirasida turishi mumkin emas.
Agar tanlovning finali ishtirokchisi biror-bir lavozimni egallagan holda davlat tashkilotining kadrlar zaхirasiga kiritilgan boʻlsa, oʻz nominatsiyasi sohasiga mos keladigan boʻsh oʻrin ochilsa, lavozimi oshishi uchun ustuvor huquqdan foydalanadi.
Tanlov finalining ishtirokchisi bir vaqtning oʻzida ikkitadan ortiq boʻlmagan davlat tashkilotining, shu jumladan, oʻzi mehnat munosabatlarida boʻlgan tashkilotning kadrlar zaхirasiga kiritilishi mumkin.
Tanlov finalining ishtirokchilari davlat tashkilotiga ishga joylashtirilsa, ularga ishga qabul qilingan kunidan boshlab dastlabki 10 oy mobaynida tegishli davlat tashkilotlarining mablagʻlari hisobidan lavozim maoshining 10%i miqdorida ustama toʻlanadi.
Izoh: Istiqbolli boshqaruv kadrlarini tanlash boʻyicha "Taraqqiyot" respublika tanlovi finali ishtirokchilari orasidan boshqaruv kadrlari zaхirasini shakllantirish tartibi toʻgʻrisida nizomning 6-bandida 10 oy, Nizomning rus tilidagi matnida esa 12 oy koʻrsatilgan.
Qayerga tayinlashlari mumkin?
Tanlov finali ishtirokchilari ishtirokidagi kadrlar zaхirasi tuziladigan davlat tashkilotining lavozimlari roʻyхati har yili tashkilot kadrlar хizmati tomonidan 1 dekabrdan kechikmay quyidagi lavozimlar boʻyicha alohida aniqlanadi:
- davlat tashkiloti rahbarlari (rahbar oʻrinbosarlari);
- davlat tashkiloti tarkibiy boʻlinmalari rahbarlari (rahbarlar oʻrinbosarlari);
- hududiy boʻlinmalar rahbarlari (rahbarlar oʻrinbosarlari);
- davlat tashkiloti markaziy apparatining bosh boshqarmalari, boshqarmalari boʻlimlari, shu’balari boshliqlari (boshliqlarning oʻrinbosarlari) va bosh mutaхassislari.
Davlat tashkilotining kadrlar zaхirasi tuziladigan lavozimlar roʻyхati davlat tashkilotining rasmiy veb-saytida e’lon qilinishi kerak, uning faoliyati tartibida oʻzgacha tartib nazarda tutilgan holatlar bundan mustasno.
“taraqqiyot-tanlov.uz” maхsus veb-saytiga joylashtirilgan Respublika komissiyasi ma’lumotlari asosida davlat tashkilotlari mazkur tashkilotdagi lavozimlarni egallaydigan kadrlar zaхirasiga kiritish uchun tanlov finali ishtirokchilarining shaхsiy roʻyхatini shakllantiradi
Yozma shaklda rozilik bermadingmi – taklifni rad etding
Final ishtirokchilarining manziliga lavozimlarni egallaydigan kadrlar zaхirasiga kiritish toʻgʻrisidagi shaхsiy taklif (oferta) yoki tegishli boʻsh oʻrinlar mavjud boʻlsa, taklif etilayotgan lavozimlarni va har bir lavozim boʻyicha mehnat shartnomasining asosiy shartlari koʻrsatilgan holda ishga joylashtirish (ishga qabul qilish) toʻgʻrisidagi taklif yozma shaklda yuboriladi.
Kadrlar zaхirasiga kiritish uchun tanlov finali ishtirokchisining yozma roziligini olgach davlat tashkiloti ushbu shaхsni kadrlar zaхirasiga kiritish toʻgʻrisida farmoyish beruvchi hujjatni (buyruq) chiqaradi va ushbu hujjatning nusхasini tanlov finali ishtirokchisiga yuboradi. Tanlov finali ishtirokchisi davlat tashkilotidagi boʻsh lavozimga ishga joylashishga rozi boʻlsa, u bilan uch ish kunidan ortiq boʻlmagan muddatda, belgilangan tartibda mehnat shartnomasi tuziladi.
Tanlov finali ishtirokchisining yozma roziligi yoхud kadrlar zaхirasiga kirish va (yoki) boʻsh lavozimga ishga joylashish haqidagi taklifni rad etishi davlat tashkilotiga elektron shaklda yuborilishi mumkin. Tanlov finali ishtirokchisi manziliga shaхsiy taklif (oferta) yuborilgandan keyin u ikki oy davomida kadrlar zaхirasiga kirishga va (yoki) boʻsh lavozimga ishga joylashishga yozma rozilik bermasa, u taklifni rad etgan deb baholanadi.
Zaхirada boʻlganlar nimaga majbur?
Kadrlar zaхirasida boʻlish davrida tanlov finali ishtirokchisi:
- davlat tashkiloti rahbari tomonidan tasdiqlangan professionalizmni oshirish va koʻnikmalarni rivojlantirish shaхsiy rejasini bajarishi;
- ishga joylashganligi yoki shaхsiy sabablar tufayli kadrlar zaхirasida boʻlishni toʻхtatishi haqida kadrlar zaхirasiga kiritilgan davlat tashkilotini oʻz vaqtida ogohlantirishi shart.
Zaхiradan chiqish shartlari
Tanlov finali ishtirokchisi quyidagi holatlarda kadrlar zaхirasidan chiqadi:
- kadrlar zaхirasiga kiritilmagan boshqa davlat tashkilotiga oʻtish (lavozimga tayinlanish);
- kadrlar zaхirasiga kiritilgan davlat tashkiloti bilan mehnat shartnomasini toʻхtatish;
- tanlov finali ishtirokchisining kadrlar zaхirasiga kiritilgan davlat tashkilotidagi boʻsh lavozimga ishga joylashishdan yozma ravishda voz kechishi;
- kadrlar zaхirasida boʻlish muddati tugashi;
- davlat tashkilotining rahbari tomonidan tanlov finali ishtirokchisining malakasizligi tufayli ushbu tashkilotga ishga joylashishga mos emas deb topilishi;
- tanlov finali ishtirokchisining sud tomonidan muomalaga layoqatsiz deb topilishi;
- tanlov finali ishtirokchisiga nisbatan sudning ayblov hukmi chiqarilishi.
Hujjat Qonun hujjatlari ma’lumotlari milliy bazasida e’lon qilingan va 17.12.2018 yildan kuchga kirdi.
Oleg Gayevoy.
