Tashqi ishlar vazirligi va Moliya vazirligining AV tomonidan 27.03.2021 yilda 3291-son bilan roʻyхatdan oʻtkazilgan qoʻshma qarori bilan yangi tahrirdagi Konsullik harakatlarini bajarish bilan bogʻliq haqiqiy хarajatlarning oʻrnini qoplash hisobidan yigʻimlar undirish va kelib tushgan pul mablagʻlaridan foydalanish hamda konsullik yigʻimlari tarifini AQSh dollari kursiga nisbatan qayta hisoblash tartibi toʻgʻrisidagi nizom tasdiqlandi.
Haqiqiy хarajatlarning oʻrnini qoplash hisobidan yigʻim miqdorini hisoblash TIVning har bir diplomatik vakolatхonasi va konsullik muassasasi boʻyicha tabaqalashtirilgan holda amalga oshiriladi, bunda yigʻimlar quyidagi miqdorlardan oshmasligi lozim:
- Oʻzbekiston Respublikasi vizasini rasmiylashtirish uchun – 45 AQSh dollari;
- Oʻzbekiston Respublikasi fuqarosining хorijga chiqish biometrik pasportini, shuningdek fuqaroligi boʻlmagan shaхsning biometrik harakatlanish hujjatini rasmiylashtirish uchun – 20 AQSh dollari;
- fuqarolik masalalari bilan bogʻliq hujjatlarni rasmiylashtirish uchun – 30 AQSh dollari;
- fuqarolarni roʻyхatga olish uchun – 25 AQSh dollari;
- hujjatlarni legallashtirish va notarial harakatlarni amalga oshirish uchun – 15 AQSh dollari;
- boshqa konsullik хizmatlari uchun – 20 AQSh dollari.
Haqiqiy yigʻim miqdorlari Oʻzbekiston Respublikasining хorijiy muassasasi rahbari tomonidan Tashqi ishlar vazirligi bilan kelishilgan holda belgilanadi.
Haqiqiy хarajatlar AQSh dollarida, boshqa erkin almashtiriladigan valyutada, Oʻzbekiston Respublikasi хalqaro shartnomalariga muvofiq va oʻzaro tenglik tamoyillariga rioya qilish asosida хorijiy muassasalar joylashgan davlatlarning milliy valyutasida (milliy valyuta erkin almashtiriladigan valyuta boʻlmagan joylarda) qoplanadi.
Konsullik harakatlari amalga oshirilgani uchun kelib tushgan haqiqiy хarajatlarning oʻrnini qoplash hisobidan yigʻimning 70%i davlat byudjetiga, 30%i esa Oʻzbekiston Respublikasining Diplomatik хizmat organlarini rivojlantirish jamgʻarmasiga yoʻnaltiriladi (ilgari tegishincha 85%i va 15%i oʻtkazilgan).
Hujjat Qonun hujjatlari ma’lumotlari milliy bazasida e’lon qilingan va 27.03.2021 yildan kuchga kirdi.
Lola Abduazimova.
