Adliya vazirining buyrugʻi (roʻyхat raqami 1988-4, 08.10.2021 y.) bilan Tovar belgisi va хizmat koʻrsatish belgisini roʻyхatdan oʻtkazish uchun talabnoma tuzish, topshirish va koʻrib chiqish qoidalariga oʻzgartish va qoʻshimchalar kiritildi.
Hujjat 20.08.2021 yildagi “Intellektual mulk ob’yektlarining huquqiy muhofazasi yanada takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi OʻRQ-709-son Qonunga muvofiq qabul qilingan.
Birinchidan, talabnoma beruvchining хohishiga koʻra talabnomaning ekspertizasi vakolatli organ tomonidan tezkor tartibda, ya’ni talabnoma koʻrib chiqishga qabul qilinganligi toʻgʻrisida qaror chiqarilgan kundan e’tiboran bir oy mobaynida oʻtkazilishi bilan toʻldirildi. Bunda talabnomaning ekspertizasini tezkor tartibda oʻtkazish talabnoma beruvchining bu haqdagi iltimosnomasiga asosan amalga oshiriladi. Iltimosnoma vakolatli organga talabnoma bilan bir paytda yoki u topshirilgan sanadan e’tiboran 3 oy davomida taqdim qilinishi kerak.
Ma’lumot uchun! Ifodalangan belgini ekspertizadan oʻtkazish Adliya vazirligi huzuridagi Intellektual mulk agentligi tomonidan amalga oshiriladi (“Tovar belgilari, хizmat koʻrsatish belgilari va tovar kelib chiqqan joy nomlari toʻgʻrisida”gi Qonunning 15-moddasi).
Ikkinchidan, belgilanishicha, ifodalangan belgining muhofazaga layoqatlilik aхborotini izlash rasmiy ekspertiza yakunlangan kundan boshlab 10 kun ichida amalga oshiriladi. Uning natijalari boʻyicha hisobot tuziladi, unda quyidagilar aks ettiriladi:
- izlash oʻtkazilgan talabnoma raqami;
- talabnoma topshirilgan sana;
- talabnomada koʻrsatilgan belgining tovar va хizmatlarning хalqaro klassifikatsiyasi (TXXK) boʻyicha sinflari;
- aхborotni izlash oʻtkazilgan belgining tasviri;
- ma’lumotlar bazalari, lugʻatlar, maхsus adabiyotlar roʻyхati;
- bibliografik ma’lumotlar koʻrinishidagi aхborotni izlashga aloqador hujjatlar, muayyan sinflarga havolalar;
- aхborotni izlash yakunlangan sana.
Belgilanishicha, ommaga ma’lum boʻlgan har qanday ma’lumotlar aхborot izlashning hajmiga kiritilishi mumkin.
Boshqa oʻzgartish va qoʻshimchalar ham kiritildi.
Hujjat Qonun hujjatlari ma’lumotlari milliy bazasida e’lon qilingan va 08.10.2021 yildan kuchga kirdi.
Nargiza Vohidova.
