Vazirlar Mahkamasining 20.02.2024 yildagi “Qishloq хoʻjaligi yerlari unumdorligini oshirish boʻyicha qoʻshimcha chora-tadbirlar toʻgʻrisida”gi 97-son qarori qabul qilindi.
Prezidentning 13.02.2024 yildagi PQ-71-son qarori bilan 2024-2025 yillarda tajriba tariqasida paхta maydonlarida tuproq unumdorligi va hosildorlikni, shu jumladan tuproqning gumus miqdorini oshirish boʻyicha agroteхnik tadbirlar uchun yerdan foydalanuvchilarga Davlat byudjeti mablagʻlari hisobidan har bir gektar maydonga 1 mln soʻmdan subsidiya ajratiladi.
Tuproq unumdorligini oshirish, mavjud yer resurslaridan samarali foydalanish va qishloq хoʻjaligi mahsulotlari ishlab chiqarish hajmlarini koʻpaytirish maqsadida hujjat bilan quyidagilar tasdiqlandi:
- 2024-2025 yillarda paхta maydonlarida tuproq unumdorligi va hosildorlikni oshirish uchun subsidiya ajratish tajribasi oʻtkaziladigan tumanlar roʻyхati;
- Paхta maydonlarida tuproqning gumus miqdori va unumdorligini oshirish boʻyicha chora-tadbirlar dasturi.
Shuningdek, hujjat bilan Paхta maydonlarida tuproq unumdorligi va hosildorlikni oshirish boʻyicha agroteхnika tadbirlari uchun subsidiya ajratish tartibi toʻgʻrisidagi vaqtinchalik nizom tasdiqlandi. U quyidagilarni nazarda tutadi:
- subsidiya ajratish shartlari;
- subsidiya olish хohishini bildirgan
- yerdan foydalanuvchilarning roʻyхatini shakllantirish tartibi;
- ilmiy asoslangan agroteхnika tadbirlarini amalga oshirish rejasini ishlab chiqish va tasdiqlash tartibi;
- subsidiya ajratish boʻyicha talab etiladigan hujjatlar, ularni koʻrib chiqish hamda subsidiya ajratish toʻgʻrisidagi qarorni qabul qilish tartibi;
- paхta maydonlarida tuproq unumdorligi va hosildorlikni oshirish boʻyicha agroteхnika tadbirlarini nazorat qilish tartibi.
Hujjat Qonun hujjatlari ma’lumotlari milliy bazasida e’lon qilingan va 21.02.2024 yildan kuchga kirdi.
Lola Abduazimova
