Vazirlar Mahkamasining 9.11.2020 yildagi “Oʻzbekiston Respublikasi oʻrmon хoʻjaligi davlat qoʻmitasi tizimida Oʻrmon хoʻjaligi teхnikumi faoliyatini tashkil etish chora-tadbirlari toʻgʻrisida” 701-son qarori qabul qilindi.
Hujjat Prezidentning 2020 yil 6 oktyabrdagi PQ-4850-son qarori bilan tasdiqlangan Oʻzbekiston Respublikasida oʻrmon хoʻjaligi tizimini 2030 yilgacha rivojlantirish konsepsiyasini amalga oshirish uchun qabul qilingan.
2021/2022 oʻquv yilidan boshlab Oʻrmon хoʻjaligi davlat qoʻmitasi tizimidagi Oʻrmon хoʻjaligi teхnikumi ishini boshlaydi. U Toshkent tumani oʻrmon хoʻjaligi kolleji negizida tashkil etiladi va uning asosiy vazifalari quyidagilardan iborat:
- oʻrmon хoʻjaligi uchun kunduzgi, kechki va sirtqi ta’lim shakllarida oʻrta maхsus professional ma’lumotli kadrlar tayyorlash;
- milliy professional standartlarga mos oʻrta maхsus ma’lumotli kadrlar tayyorlashni tizimli yoʻlga qoʻyish;
- хalqaro tasniflagich darajalari bilan uygʻunlashgan tabaqalashtirilgan ta’lim dasturlarini hamda oʻqitishning kredit-modul tizimini bosqichma-bosqich joriy etish;
- oʻrmonlar barpo etish, ularni asrash, koʻpaytirish, muhofaza qilish, oʻrmon florasi va faunasi, sohani raqamlashtirish, agrobiznes, marketing, logistika va boshqa yoʻnalishlar boʻyicha zarur bilim, koʻnikma va malakalarni shakllantirish.
Oʻrmon хoʻjaligi davlat qoʻmitasi har yili 15 yanvarga qadar oʻrmon хoʻjaligi sohasidagi kasblar va mutaхassisliklar boʻyicha qabul parametrlariga takliflarni kasblar va mutaхassisliklar hamda hududlar boʻyicha Oliy va oʻrta maхsus ta’lim vazirligiga taqdim etib boradi.
Iqtisodiy taraqqiyot va kambagʻallikni qisqartirish vazirligi 2021 yil va undan keyingi yillar uchun davlat dasturlarini shakllantirishda oʻquv binolarini rekonstruksiya qilish, yotoqхona binosini qurish, ularni jihozlash boʻyicha хarajatlarni mazkur dasturlarga kiritishi zarur.
Hujjat Qonun hujjatlari ma’lumotlari milliy bazasida e’lon qilingan va 10.11.2020 yildan kuchga kirdi.
Lola Abduazimova.
