Oʻzbekiston Respublikasi Istiqbolli loyihalar milliy agentligi direktorining 07.07.2025 yildagi 3639-son buyrugʻi bilan Oʻyinchilar va garovlarning yagona davlat registri toʻgʻrisidagi nizom tasdiqlandi.
Hujjatga muvofiq, Oʻyinchilar va garovlarning yagona davlat registrini yuritishning quyidagi vazifalari belgilandi:
- oʻyinlarni tashkil etishda moliyaviy operatsiyalarning konsolidatsiyalashgan hisobi va nazorati;
- oʻyinlarni tashkil etishda davlat nazoratini amalga oshirish uchun zarur ma’lumotlarni toʻplash (shakllantirish), saqlash, tizimlashtirish va taqdim etish;
- oʻyinlarni tashkil etishda oʻyinchilar va investorlarning huquqlari va qonuniy manfaatlarini himoya qilish;
- oʻyinlarni tashkil etishda noqonuniy faoliyatning oldini olish, oʻyinlarga qaramlik koʻrinishlarining oldini olish va kamaytirish.
Registrning asosiy funksiyalari:
- jismoniy va yuridik shaхslarning markaziy ma’lumotlar bazalari bilan oʻzaro hamkorlik qilish;
- oʻyinchilar, oʻyinlar va tadbirlar tashkilotchilari haqidagi ma’lumotlarni toʻplash, qayta ishlash va saqlash;
- barcha tranzaksiyalarni, jumladan, mablagʻlarni qabul qilish, yutuqlarni toʻlash, stavkalar, ularning natijalari va qaytarishlarni hisobga olish;
- oʻyin bozori dinamikasi va hajmlari toʻgʻrisidagi hisobotlarni shakllantirish;
- oʻyinchilar va investorlarning huquqlari va qonuniy manfaatlarini himoya qilish boʻyicha zarur choralarni koʻrish va boshqalar.
Davlat aхborot tizimlarini yaratish va qoʻllab-quvvatlash boʻyicha yagona integrator –"UZINFOCOM" MChJ registr operatori hisoblanadi.
Reyestr quyidagi reyestrlardan iborat:
- Oʻyinchilarning yagona reyestri;
- Cheklovlar (taqiqlar), shu jumladan garov oʻynashda yoki onlayn oʻyinlarda sarflanishi (yutqazilishi) mumkin boʻlgan pul mablagʻlari summasiga limitlarning yagona reyestri;
- Sotib olingan lotereya biletlari, garov oʻynashda olingan pul mablagʻlari va onlayn oʻyinlarga investitsiya qilingan pul mablagʻlari bilan bogʻliq moliyaviy operatsiyalar reyestri;
- Yutuqlarni toʻlash reyestri.
Hujjat Qonun hujjatlari ma’lumotlari milliy bazasida e’lon qilingan va 08.07.2025 yildan kuchga kirdi.
Lola Abduazimova
