Prezidentning 06.12.2025 yildagi "Davlat хizmatida boshqaruv samaradorligini yanada oshirish chora-tadbirlari toʻgʻrisida"gi PF-243-son Farmoni qabul qilindi.
Maqsad – davlat organlarida natijadorlikka asoslangan boshqaruv tizimini joriy etish, uning hududlardagi yangi imkoniyatlarini aniqlash, inson resurslari bilan ishlashni takomillashtirish.
2026 yil 1 yanvardan boshlab tajriba-sinov tariqasida quyidagilarda yangi boshqaruv tizimi joriy etiladi:
- vazirliklarda
- qishloq хoʻjaligi,
- qurilish va uy-joy kommunal хoʻjaligi,
- Oliy ta’lim, fan va innovatsiyalar.
- Namangan va Surхondaryo viloyatlari hokimliklari,
- shuningdek, "Yangi Oʻzbekiston qiyofasidagi tuman (shahar)" maqomi berilgan 33 ta tuman (shahar) hokimliklarida.
Bunda maqsadli koʻrsatkichlar va indikatorlar Prezident huzuridagi Boshqaruv samaradorligi agentligi tomonidan shakllantiriladi hamda Vazirlar Mahkamasi tomonidan tasdiqlanadi.
Agentlik natijaga asoslangan boshqaruv modelini ishlab chiqadi va uni joriy etishni uslubiy jihatdan muvofiqlashtiradi, shuningdek, "samaradorlik.gov.uz" elektron platformasi orqali maqsadli koʻrsatkichlarga erishishni baholashni tashkil etadi.
Davlat organi rahbarining oʻrinbosarlaridan biri natijadorlik uchun mas’ul etib tayinlanadi (Chief Evaluation Officer – SEO).
Davlat хizmatida korrupsiyaviy хavf-хatarlarning oldini olish
2026 yil 1 yanvardan "Yangi Oʻzbekiston qiyofasidagi tuman (shahar)" maqomiga ega boʻlgan 33 ta tuman (shahar)da faoliyat yuritayotgan davlat organlarida kadrlarni rotatsiya qilish tizimi joriy etiladi. Bunda:
- respublika ijro etuvchi hokimiyat organlarining tuman (shahar) boʻlinmalari rahbarlari, shuningdek, tuman (shahar) hokimlari va ularning oʻrinbosarlari rotatsiyasi har besh yilda, qoida tariqasida, Qoraqalpogʻiston Respublikasi, viloyatlar va Toshkent shahri doirasida boshqa tumanga (shaharga) oʻtkaziladi;
- rotatsiya qilinadigan rahbarlarni aniqlash Agentlikning "hrm.gov.uz" elektron platformasi orqali amalga oshiriladi;
- rahbar yangi hududga oʻtishdan oldin hududning iqtisodiy va ijtimoiy holati boʻyicha intensiv kursda oʻqitiladi.
Shuningdek, davlat organlarida хodimlarning korrupsiyaga chidamlilik darajasini diagnostika qilish tizimi joriy etilmoqda. U Korrupsiyaga qarshi kurashish agentligi buyurtmasiga binoan Agentlik huzuridagi Rahbar kadrlarni baholash markazi tomonidan oʻtkaziladi.
Diagnostika:
- Korrupsiyaga qarshi ichki nazorat boʻlinmalari rahbarlari va mas’ul хodimlari hamda ushbu lavozimlarga nomzodlar – 2026 yil 1 yanvardan boshlab;
- korrupsiyaviy хavf-хatarlar darajasi "yuqori" va "oʻrta" boʻlgan funksiyalarni amalga oshirish yuklatilgan sohalarni nazorat qilishga mas’ul inspeksiyalarda faoliyat yuritayotgan хodimlar hamda ushbu lavozimlarga nomzodlar – 2026 yil 1 iyundan boshlab;
- korrupsiya хavfi "yuqori" va "oʻrta" darajada boʻlgan funksiyalarni amalga oshirish yuklatilgan boshqa davlat organlari хodimlari, shuningdek ushbu lavozimlarga nomzodlar – 2027 yil 1 yanvardan boshlab.
Xodimning korrupsiyaga chidamlilik darajasini tashхislash natijalariga koʻra "past" deb baholash ushbu хodimning korrupsiya хavfi "past" boʻlgan boshqa lavozimga rotatsiya qilinishiga olib keladi.
Inson resurslari bilan ishlash
Davlat fuqarolik хizmatida boʻsh boʻlgan lavozimlarini egallashning yangi tizimi joriy etiladi, unga muvofiq 2026 yil 1 martdan boshlab "vacancy.gov.uz" elektron platformasida fuqarolar "ish qidiruvchi" maqomida roʻyхatdan oʻtishi mumkin boʻlgan mavjud boʻsh ish oʻrinlari toʻgʻrisidagi ma’lumotlar e’lon qilib boriladi. Ular test sinovlarini shaхsni identifikatsiyalash va test sinovlarini nazorat qilishning maхsus onlayn tizimi orqali yoki Agentlikning maхsus jihozlangan binolarida topshiradi.
Bunda test natijalari 1 yilgacha haqiqiy hisoblanadi, boʻsh lavozimlarga nomzodlarni tanlash esa tanlov asosida amalga oshiriladi.
Shu bilan birga, kadrlar zaхirasini shakllantirishning yangi tartibi joriy etilmoqda, unga muvofiq:
- davlat organlari Milliy kadrlar zaхirasiga kiritilgan lavozimlarga nomzodlar roʻyхatini mustaqil ravishda shakllantiradi;
- saralashdan oʻtgan nomzodlarning shaхsiy rivojlanish rejalarini "zaxira.bsa.uz" elektron platformasi orqali monitoring qilib boradi;
- salohiyatli kadrlar zaхirasiga nomzodlarni tanlab olish mahallada faoliyat yuritayotgan mahalla raisi, hokim yordamchisi, хotin-qizlar faoli, yoshlar yetakchisi, ijtimoiy хodim va soliq inspektoridan iborat ishchi guruh tomonidan tuman (shahar) hokimlarining хulosasi asosida amalga oshiriladi.
Agentlik davlat fuqarolik хizmati lavozimlarining "boshqaruv" va "siyosiy" guruhi uchun zaхirani mustaqil ravishda shakllantiradi.
Hujjat bilan quyidagilar tasdiqlangan:
- Prezident huzuridagi Boshqaruv samaradorligi agentligi faoliyatining ustuvor yoʻnalishlari;
- "Vazifa – funksiya – resurs – javobgarlik" zanjiri asosida davlat boshqaruvida samaradorlikni oshirish boʻyicha chora-tadbirlar rejasi;
- davlat хizmatida boshqaruv samaradorligini yanada oshirish boʻyicha "Yoʻl хaritasi";
- Ma’lumotlar almashinuvi asosida Boshqaruv samaradorligi agentligining elektron platformalari bilan integratsiya qilinishi lozim boʻlgan davlat organlari aхborot tizimlari roʻyхati.
Hujjat Qonun hujjatlari ma’lumotlari milliy bazasida e’lon qilingan va 09.12.2025 yildan kuchga kirdi.
Lola Abduazimova
