YaSTga oʻtganda hisobot berishga toʻgʻri keladi

SKga muvofiq suv resurslaridan foydalanganlik uchun soliq, mol-mulk soligʻi va yer soligʻi boʻyicha hisob-kitoblar soliq organlariga yilda bir marta, yillik moliyaviy hisobot topshiriladigan muddatlarda taqdim etiladi. Bunda yil mobaynida soliq solishning soddalashtirilgan tizimiga oʻtilganda SKda mazkur hisob-kitoblarni taqdim etish muddatlari oʻrnatilmagan edi.

SKning 263, 271 va 285-moddalariga kiritilgan qoʻshimchalar quyidagi tartibni nazarda tutadi: umumbelgilangan soliqlarni toʻlovchilar hisoblangan kichik biznes sub’yektlari yil mobaynida yagona soliq toʻloviga oʻtgan taqdirda umumbelgilangan soliqlarni toʻlash davri uchun yuqorida koʻrsatilgan soliqlar boʻyicha hisob-kitoblarni taqdim etishlari kerak boʻladi.

Hisob-kitob soliq toʻlovchi soliq toʻlashning soddalashtirilgan tizimiga oʻtgan oyning 10-sanasidan kechiktirmay  DSIga taqdim etiladi.

Masalan, agar umumbelgilangan soliqlarni toʻlagan kichik korхona 2017 yilning 2-choragidan YaSTni toʻlashga oʻtsa, u yuqorida koʻrsatilgan soliqlarni 2017 yil 1-choragi uchun hisoblashi va 10 aprelgacha ular boʻyicha hisob-kitoblarni DSIga taqdim etishi zarur.

Mazkur hujjatning toʻliq matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.

Muzaffar Mirzagʻaniyev,

ekspertimiz.

Mavzuga oid material:

Senat soliq va byudjet siyosatiga oʻzgartirishlarni muhokama qildi