ҚҲТБТ порталида 2018–2024 йилларда тезкор тиббий ёрдам хизматларини такомиллаштиришга доир чора-тадбирлар комплекси муҳокама қилина бошлади.
Вазирлар Маҳкамасининг қарори лойиҳасида қайд этилишича, Ўзбекистон билан Халқаро тараққиёт ассоциацияси (бундан кейин – ХТА) ўртасида 2018 йил 17 майда «Тезкор тиббий ёрдам хизматларини такомиллаштириш» лойиҳасини молиялаштириш тўғрисида битим имзоланган. Унга кўра ХТА 100 млн АҚШ доллари миқдорида кредит ажратади. Қарз Давлат бюджети маблағлари ҳисобидан қопланиши мўлжалланмоқда.
Лойиҳа доирасида тезкор тиббий ёрдам хизмати фаолият юритиши, тизимни бошқариш ва сифатни яхшилаш учун қулай шарт-шароитлар яратиш режалаштирилмоқда. Лойиҳанинг бошқа компоненти тезкор тиббий ёрдам хизматининг диспетчерлик, коммуникацион ва ахборот тизимларини такомиллаштиришга йўналтирилади. Стационаргача тезкор тиббий ёрдам кўрсатиш тизими такомиллаштирилади.
Муассасаларни замонавий асбоб-ускуналар билан жиҳозлашга тайёрлаш жараёнида мавжуд биноларни реконструкция қилиш ва янгиларини қуриш режалаштирилмоқда.
Соғлиқни сақлаш вазирлиги Республика тезкор тиббий ёрдам илмий марказини лойиҳанинг ижрочи агентлиги этиб белгилашни таклиф қилмоқда.
Лойиҳа рад этилиши, ўзгартирилиши ёки унга қўшимча киритилиши мумкин.
Олег Гаевой.
