Вазирлар Маҳкамасининг 30.10.2023 йилдаги 578-сон қарори билан Ер ресурсларининг ҳолати бўйича миллий ҳисоботни юритиш тартиби тўғрисидаги низом тасдиқланди.
Низом Президентнинг «Ўзбекистон Республикаси Давлат солиқ қўмитаси ҳузуридаги Кадастр агентлиги фаолиятини янада такомиллаштириш чора-тадбирлари тўғрисида» 2022 йил 20 октябрдаги ПҚ-405-сон қарорига мувофиқ қабул қилинди. У қуйидагиларни назарда тутади:
- ер ҳисоботини юритиш тартибини;
- ер ҳисоботи шаклларини тасдиқлашни;
- ер ресурсларининг ҳолати бўйича миллий ҳисоботни шакллантириш ва тақдим этиш тартибини;
- ер фонди тоифаларидаги ўзгаришларни ҳисобга олиш тартибини.
Кадастр агентлигига 2024 йил 1 январга қадар «Yer hisobot» автоматлаштирилган ахборот тизимини (AAT) ишга тушириш ҳамда уни «E-qaror» электрон тизими билан интеграция қилинишини таъминлаш топширилди.
Кадастр агентлигининг Давлат кадастрлари палатаси «Yer hisobot» AAT оператори ҳисобланади. Ер ҳисоботига ўзгартиришлар киритиш, ерларни тоифаларга ажратиш ва бир тоифадан бошқасига ўтказиш натижалари ваколатли давлат органларининг қарорлари асосида «Yer hisobot» ААТга киритиб борилади.
Маҳаллий ижро этувчи ҳокимият органларининг ер ресурсларини хатловдан ўтказиш натижаларини тасдиқлаш тўғрисидаги қарорлари реал вақт режимида «E-qaror» электрон тизими орқали «Yer hisobot» ААТга тақдим этилади.
Ер ҳисоботи Ўзбекистон Республикаси, Қорақалпоғистон Республикаси, вилоятлар, Тошкент шаҳри ҳамда туман ва шаҳарлар маъмурий-ҳудудий чегарасида жойлашган барча ер эгалари, ердан фойдаланувчилар, ижарачилар ва мулкдорлар бўйича юритилади.
Ҳужжат Қонун ҳужжатлари маълумотлари миллий базасида эълон қилинган ва 31.10.2023 йилдан кучга кирди.
Лола Абдуазимова.
