Вазирлар Маҳкамасининг 19.05.2026 йилдаги "Ёшларни оилавий ҳаётга тайёрлаш тизимини янада такомиллаштириш ҳамда оилавий маслаҳат хизматларини ташкил этиш чора-тадбирлари тўғрисида"ги 257-сон қарори қабул қилинди.
Мақсад - ёшларни оилавий ҳаётга тайёрлаш тизимини такомиллаштириш, ҳуқуқий ва психологик хизматлар кўрсатиш, ота-оналарни ўқитиш дастурлари орқали болаларни масъулиятли тарбиялаш кўникмаларини шакллантириш, шунингдек, оилалардаги маънавий-ахлоқий муҳитни янада яхшилашдан иборат.
Бунинг учун туман (шаҳар) ёшларни оилавий ҳаётга тайёрлаш марказлари ҳузурида юридик шахс бўлмаган оилавий маслаҳат пунктлари ташкил этилади.
Улар никоҳдан ўтаётган ёшларни, турмуш қурганига 5 йил бўлмаган, муаммолари бор ёш оилаларни ўқитади, психологик, ҳуқуқий ва тиббий соҳаларда оилавий маслаҳат хизматларини кўрсатади.
Шунингдек, ёшлар учун гиёҳвандлик, оила иқтисодиёти ва бюджет, репродуктив саломатлик асослари, оилавий-ҳуқуқий муносабатлар, маънавий-ахлоқий қадриятларни мустаҳкамлаш, жумладан, оилавий низоларни зўравонликсиз ҳал қилиш маданиятини шакллантириш бўйича тренинглар ташкил этиш режалаштирилган.
Ушбу пунктларда хотин-қизларга замонавий тадбиркорлик кўникмаларини шакллантириш бўйича маслаҳатлар берилади, хавфсиз миграцияни таъминлашда ёрдам кўрсатилади, меҳнат бозорида талаб юқори бўлган касблар ва хорижий тилларга ўқитилади.
Ҳужжат билан қуйидагилар тасдиқланди:
• Оила ва хотин-қизлар билан ишлаш марказларидаги оилавий маслаҳат пунктларининг чора-тадбирлар режаси;
• Оила ва хотин-қизлар марказлари фаолияти самарадорлигини баҳолаш учун асосий самарадорлик кўрсаткичларини (KPI) ҳисоблаш тартиби тўғрисидаги низом.
Ҳужжат Қонун ҳужжатлари маълумотлари миллий базасида эълон қилинган ва 20.05.2026 йилдан кучга кирди.
Лола Абдуазимова
