Давлатимиз раҳбари 2019 йил 22 февралда тегишли қарорни имзолади.
Эслатиб ўтамиз, шу пайтгача фуқароларнинг муддатли ҳарбий хизматга ҳамда сафарбарлик чақируви резервидаги (СЧР) хизматга чақирилиши Президентнинг қарорига асосан йилига 1 марта – февраль-март ойларида ўтказилган («Умумий ҳарбий мажбурият ва ҳарбий хизмат тўғрисида»ги Қонуннинг 19-моддасига қаранг).
Жорий йилдан бошлаб чақирилиш муддатини кечиктириш ҳуқуқига эга бўлмаган Ўзбекистон фуқаролари ҳар йили март-апрель ойларида муддатли ҳарбий хизматга чақирилади. Тегишинча, 2018 йилда муддатли ҳарбий хизматга чақирилган, ҳарбий хизматнинг белгиланган муддатларини ўтаб бўлганлар 2019 йилнинг март-апрель ойларида резервга бўшатилади.
Илгаригидек, муддатли ҳарбий хизматни ўташга яроқли ҳамда чақирилиш муддатини кечиктириш ва чақирилишдан озод этиш ҳуқуқига эга бўлмаган, жорий йил чақирув мобайнида Қуролли Кучлар сафига чақирилмайдиган фуқаролар СЧРга олинади (батафсил қаранг).
Маълумот учун: чақирилиш муддатини кечиктириш ҳуқуқига эга бўлган фуқароларнинг тоифалари «Умумий ҳарбий мажбурият ва ҳарбий хизмат тўғрисида»ги Қонуннинг 21-моддасида, ундан озод этилганлар – 22-моддасида кўрсатилган.
Олег Заманов.
.png)
