Вазирлар Маҳкамасининг 05.11.2024 йилдаги "Ёввойи ҳайвонларни муҳофаза қилиш тартибини такомиллаштириш чора-тадбирлари тўғрисида"ги ВМҚ-736-сон қарори қабул қилинди.
"Ҳайвонот дунёсини муҳофаза қилиш ва ундан фойдаланиш тўғрисида"ги Қонуннинг 43-моддасига мувофиқ жисмоний шахсларга ярим эркин шароитларда, сунъий яратилган яшаш муҳитида ёки асирликда сақлаш тақиқланган ёввойи ҳайвонлар Рўйхати, шунингдек юридик шахслар томонидан ушбу рўйхатга киритилган ёввойи ҳайвонларни сақлаш тартиби тасдиқланди.
2025 йил 1 январдан:
- жисмоний шахсларнинг Рўйхатга киритилган ёввойи ҳайвонларни ярим эркин шароитларда, сунъий яратилган яшаш жойларида ёки асирликда сақлаши;
- давлат ва кўчма цирклар (шапито)да ёввойи ҳайвонларни сақлаш ва уларни цирк томошалари учун фойдаланиш тақиқланади.
Рўйхатга киритилган ёввойи ҳайвонлар Экология, атроф-муҳитни муҳофаза қилиш ва иқлим ўзгариши вазирлигининг рухсатномалари асосида белгиланган тартибда юридик шахслар томонидан ташкил этилган ҳайвонот боғлари ва (ёки) питомниклар (террариум, океанариум, серпентарий ва ҳ.к.)да сақланиши мумкин.
Бунда Ўзбекистон Республикасининг Қизил китобига киритилган ёввойи ва заҳарли ҳайвонлар қонунчиликка мувофиқ махсус питомникларда сақланади.
Ҳужжат Қонун ҳужжатлари маълумотлари миллий базасида эълон қилинган ва 2024 йил 6 ноябрдан кучга кирди.
Лола Абдуазимова
