Халқ таълими вазирининг “Мактабгача таълимга қўйиладиган давлат талабларини тасдиқлаш тўғрисида”ги буйруғи (рўйхат рақами 2898, 2017 йил 17 июль) эълон қилинди.
Маълумот учун: 18.10.2013 йилда тасдиқланган мактабгача таълимга қўйиладиган давлат талаблари кучини йўқотди.
Янги давлат талаблари:
- давлат мактабгача таълим муассасалари;
- нодавлат мактабгача таълим муассасалари;
- қисқа муддатли гуруҳлар;
- 7 ёшгача болалар мавжуд бўлган меҳрибонлик уйлари ва болалар шаҳарчаларига нисбатан татбиқ этилади.
Қуйидагилар Давлат талабларининг вазифалари ҳисобланади:
- болаларни мактабда ўқишга тайёрлаш;
- болаларда ўқишга қизиқишни ҳамда ўқишга интилиш ҳиссини уйғотиш;
- болаларнинг ҳар томонлама ривожланиши учун интеграл таълимни ташкил этиш;
- шахсга йўналтирилган таълим-тарбияни амалга ошириш;
- болаларни халқимизнинг анъаналари асосида тарбиялаш учун шарт-шароитлар яратиш;
- болаларни мактабда ўқишга тайёрлашда уларнинг ота-оналари билан ўзаро ҳамкорлик қилиш ҳамда ота-оналарга амалий жиҳатдан кўмаклашиш;
- болаларда ижтимоий-коммуникатив, ахлоқий, эстетик сифат ва салоҳиятларни уйғотиш ҳамда ривожлантириш;
- болаларни соғлом турмуш тарзи билан таништириш;
- болаларда мустақиллик, масъулиятлилик, ташаббускорлик хислатларини шакллантириш.
Давлат талаблари асосий йўналишлар бўйича ҳар бир ёш гуруҳи учун индикаторлар тўпламини намоён этади:
- жисмоний ривожлантириш ва маданий-гигиеник кўникмаларни шакллантириш (йирик ва майда моторика, сенсомоторикани ривожлантириш, маданий-гигиеник кўникмаларни шакллантириш );
- ижтимоий-коммуникатив ривожлантириш(ижтимоийлашув, мулоқот ва одоб-ахлоқ қоидаларини шакллантириш, боланинг оила ва жамиятда ўзини тутиши,болада меҳнат тарбиясини, хавфсизлик асосларини шакллантириш);
- нутқ, савод, ўқиш ва чет тилларининг ўргатилишига тайёрлаш;
- билиш жараёнини ривожлантириш(дунё ҳақида билим ва тушунча бериш, элементар математик тасаввурларини шакллантириш);
- бадиий адабиётлар билан таништириш (бадиий эстетик, мусиқий кўникмаларни ривожлантириш).
Индикаторлар турли ёш гуруҳлари учун тасдиқланади: 2 ёшдан 7 ёшгача (қадам – 1 йил). Илгари қатор талаблар 6 ойдан 2 ёшгача бўлган болаларнинг тарбиявий жараёнига нисбатан амал қилган.
Ҳужжат давлат тилида расман эълон қилинган ва 24.07.2017 йилда кучга кирди.
Мазкур ҳужжатнинг тўлиқ матни билан, у билан боғланган бошқа қонун ҳужжатларига шарҳлар ва ҳаволалар билан «Ўзбекистон Республикаси қонунчилиги» ахборот-қидирув тизимида танишиш мумкин.
Моҳина Мирзаева.
