Президентнинг 7.05.2021 йилдаги “Нефть-газ ҳамда электр энергетика соҳалари учун малакали кадрлар тайёрлаш тизимини янада такомиллаштириш муносабати билан Ўзбекистон Республикаси Президентининг айрим қарорларига ўзгартиришлар киритиш тўғрисида”ги ПҚ-5107-сон қарори қабул қилинди.
У билан Президентнинг қуйидаги қарорларига ўзгартиришлар киритилди:
1) Президентнинг 6.07.2011 йилдаги ПҚ-1569-сон қарорининг 6-банди 2-хатбошисига, у билан белгиланишича, И.М. Губкин номидаги Россия давлат нефть ва газ университетининг Тошкент шаҳридаги филиалига (кейинги ўринларда - 1-филиал) кириш учун квоталар Россия давлат нефть ва газ университети (кейинги ўринларда - Университет), Энергетика вазирлиги, Иқтисодий тараққиёт ва камбағалликни қисқартириш вазирлиги, Олий ва ўрта махсус таълим вазирлиги, «Ўзтрансгаз» АЖ, «Ҳудудгазтаъминот» АЖ, шунингдек бошқа ташкилотлар билан келишган ҳолда Васийлик кенгаши қарори билан тасдиқланади (Илгари Филиалга қабул режаси ҳар бир ўқув йили учун Университет билан келишувга биноан “Ўзбекнефтьгаз” МХК эҳтиёжларини ҳисобга олган ҳолда Вазирлар Маҳкамасининг қарори билан тасдиқланган).
2) Президентнинг 25.09.2017 йилдаги ПҚ-3287-сон қарорига 1-иловада Васийлик Кенгашининг янгиланган Таркиби тасдиқланган.
3) Президентнинг 4.06.2019 йилдаги ПҚ-4350-сон қарорига:
а) қуйидаги муддатлар ўзгартирилди:
- 2021 йил 1 августга қадар Тошкент шаҳридаги "МЭИ" миллий тадқиқот университети" Федерал давлат бюджети олий таълим муассасаси филиалига (кейинги ўринларда - 2-филиал) тақдим этилаётган бино ва иншоотлар реконструкция қилиниши;
- 2022 йил 1 январга қадар 2-филиал жойлаштирилиши, 2-филиалга тақдим этилаётган бино ва иншоотларнинг замонавий ўқув-лаборатория ускуналари, компьютер ва оргтехника, адабиётлар ва кутубхона фонди, инвентарь, мебель ва бошқа моддий-техник воситалар билан жиҳозланиши;
б) "Enter Engineering Pte. Ltd. (Сингапур)" - 2-филиалга тақдим қилинаётган бино ва иншоотларни реконструкция қилиш, қуриш, капитал таъмирлаш ва жиҳозлаш билан боғлиқ ишларнинг бажарилиши бўйича тайёр ҳолда топшириш" шарти асосида жалб қилинадиган бош пудратчи ташкилот этиб белгиланди. Бунда, бино ва иншоотларни қуриш, реконструкция қилиш, капитал таъмирлаш ва жиҳозлаш билан боғлиқ ишларнинг бажарилиши бўйича қурилиш, лойиҳалаштириш ва молиялаштириш ишларини бир вақтнинг ўзида олиб боришга ҳамда товар (иш, хизмат)лар, қурилиш материаллари, хом ашё, бутловчи қисмлар ва асбоб-ускуналарни ишлаб чиқарувчи (хизмат кўрсатувчи)лар ҳамда уларнинг расмий дилерлари билан тўғридан-тўғри музокараларни ўтказиш ва энг мақбул таклифларни танлаб олиш шартлари асосида шартномалар тузишга истисно тариқасида рухсат берилди.
Ҳужжат Қонун ҳужжатлари маълумотлари миллий базасида эълон қилинган ва 7.05.2021 йилдан кучга кирди.
Эльмира Сиразиева.
