Адлия вазирлиги Нотариуслар томонидан нотариал ҳаракатларни амалга ошириш тартиби тўғрисидаги йўриқномага қўшимча ва ўзгартиришлар киритди (рўйхат рақами 3113-6, 1.04.2021 й.).
Биринчидан, ID-карталар жорий қилинганлиги муносабати билан Йўриқноманинг тегишли бандларига ўзгартиришлар киритилди. Хусусан, нотариал битимларни амалга ошириш учун мурожаат қиладиган Ўзбекистон Республикаси фуқароларининг, чет эл фуқаролари ва фуқаролиги бўлмаган шахсларнинг шахсини тасдиқловчи ҳужжатлар жумласига ID-карталар ҳам киритилди.
Иккинчидан, Вазирлар Маҳкамасининг 18.11.2020 йилдаги 726-сон «Нотариуслар томонидан айрим нотариал ҳаракатларни амалга ошириш тартиби тўғрисидаги маъмурий регламентларни тасдиқлаш ҳақида»ги қарори қабул қилинганлиги муносабати билан тегишли ўзгартиришлар киритилди. Тадбиркорлик субъектлари – юридик шахслар ўртасидаги кўчмас мулк олди-сотди шартномаларини тасдиқлашда (27-б.) ҳамда умумий улушли мулк иштирокчисининг айрим битимларини тасдиқлашда (35-б.) Нотариуслар томонидан кўчмас мулкларни бошқа шахсга ўтказиш ҳақидаги битимларни тасдиқлашнинг маъмурий регламенти қоидалари қўлланилиши белгиланди.
Бошқа ўзгартириш ва қўшимчалар ҳам киритилди.
Ҳужжат Қонун ҳужжатлари маълумотлари миллий базасида эълон қилинган ва 1.04.2021 йилдан кучга кирди.
Наргиза Воҳидова.
