Ҳукумат Қашқадарё вилоятида янги туризм йўналишларини ташкил этиш бўйича чора-тадбирлар режасини тасдиқлади (ВМнинг 8.03.2019 йилдаги 198-сон қарори). Адлия вазирлиги шу ҳақда хабар берди.
Хусусан, минтақада қуйидагилар ташкил этилади:
- этнотуризм йўналиши – Ғилон ва Кўл қишлоқларида, ҳар бирида 5 тадан меҳмон уйлари қурилади. Шунингдек этноқишлоқ – Амир Темур жангчиларининг ҳарбий тайёргарлик лагерига асос солинади;
- агротуризм йўналиши – Варганза ва Ҳазрати Башир қишлоқларида. Ушбу йўналиш доирасида «Анор» фестивали ўтказилади;
- экстремал туризм – Татар, Зармаст ва Вари қишлоқларида. Уларнинг ҳар бирида 5 та меҳмон уйлари, 5 та кемпинг ва 10 та ўтов қурилади;
- экологик туризм – Сарчашма ва Сувтушар қишлоқларида;
- астрономик туризм – Китоб кенглик станцияси ҳудудида.
«Фестиваллар шаҳри» бренди остида MICE-туризм (ингл. Meetings, Incentives, Conferences, Events, яъни ишбилармонлик туризми – таҳр.) йўналиши очилади.
