Бу Президентнинг 2020 йил 28 январдаги ПҚ-4575-сон қарорида назарда тутилган.
Жорий йилда Ўзбекистон Республикаси қишлоқ хўжалигини ривожлантиришнинг 2020-2030 йилларга мўлжалланган стратегияси доирасида қуйидагиларни амалга ошириш режалаштирилган:
- 1 октябрдан – аҳолини дон маҳсулотлари билан узлуксиз таъминлаш ва нархлар кескин ўзгаришининг олдини олиш мақсадида интервенцион харидлар тизими босқичма-босқич жорий этилади. 2021 йил ҳосилидан бошлаб дон учун давлат буюртмаси ҳажмлари босқичма-босқич камайтирилади, шу жумладан бошоқли дон харид қилиш ва сотишда эркин рақобатни таъминлайдиган бозор механизмлари жорий этилади. Озиқ-овқат хавфсизлигини таъминлаш учун давлат буюртмаси тизимидан давлат захирасидан фойдаланишга ўтиш бўйича механизм белгиланади;
- 1 октябргача пахта хом ашёси нархларини шакллантириш, харид қилиш ва сотишнинг бозор тамойилларига ўтишни назарда тутувчи қарор лойиҳаси Вазирлар Маҳкамасига киритилади. Бозор конъюнктураси таҳлили ва агротехника тадбирларини ўтказиш харажатларнинг прогноз ҳисоб-китоби асосида пахта-тўқимачилик кластерлари учун фермер хўжаликлари томонидан етиштирилган пахта хом ашёсини етказиб бериш бўйича шартномаларнинг шартларини аниқлашда минимал нархлар белгиланади. 2021 йил ҳосилидан бошлаб янги тартиб амал қилади;
- 1 мартдан пахта хом ашёси ва бошоқли дон етиштиришда банд бўлмаган майдонларда тупроқ-иқлим шароитлари ва бозор конъюнктурасидан келиб чиққан ҳолда туманларни босқичма-босқич ихтисослаштириш тизими жорий этилади;
- қишлоқ хўжалиги ва озиқ-овқат тармоғининг кредитлаш ва суғурталаш механизми қайта кўриб чиқилади. Хусусан, кредит тақдим қилишда «омборхона гувоҳномалари», бошқа молиявий воситалар ва ер участкаларига бўлган ижара ҳуқуқидан гаров таъминоти сифатида фойдаланилади, шунингдек қишлоқ хўжалигида хатарларни суғурталашнинг янги турлари жорий этилади;
- 1 апрелдан Тошкент вилояти Қибрай ва Тошкент туманлари, Фарғона вилояти Фарғона ва Олтиариқ туманлари ҳамда Қашқадарё вилояти Китоб ва Нишон туманларида тажриба ўтказилади. Жисмоний ва юридик шахсларга ер участкаларини қишлоқ хўжалиги мақсадлари учун шаффоф ва очиқ танлов ўтказиш орқали ажратиш механизми жорий этилади. Жисмоний ва юридик шахсларга кейинчалик танловга қўйиш бўйича ташаббус кўрсатиш ҳуқуқини тақдим этган ҳолда махсус геопортал орқали ер участкаси тўғрисидаги маълумотларни жойлаштириш ҳуқуқи берилади. Шунингдек қишлоқ хўжалигига мўлжалланган ерлардан фойдаланиш ҳуқуқининг бозор қийматини баҳолаш ҳамда улардан солиққа тортишда фойдаланиш механизми жорий этилади.
Қарорда стратегиянинг бошқа йўналишлари бўйича 2020 йилда режалаштирилган тадбирлар ҳам акс эттирилган.
Ҳужжат Қонун ҳужжатлари маълумотлари миллий базасида эълон қилинган ва 29.01.2020 йилдан кучга кирди.
Олег Заманов.
