Вазирлар Маҳкамасининг 11.06.2026 йилдаги 299-сон қарори билан Хорижий ва нодавлат ОТТларидан талабалар ўқишини давлат олий таълим ташкилотларига кўчириш бўйича давлат хизматини кўрсатишнинг маъмурий регламенти тасдиқланди.
Янги тартибга кўра, бу борада ваколатли давлат органи этиб Олий таълим, фан ва инновациялар вазирлиги ҳузуридаги Билим ва малакаларни баҳолаш агентлиги белгиланди.
Регламентга мувофиқ, талабалар ҳар йили 15 июлдан 5 августга қадар ЯИДХП, Агентликнинг махсус электрон платформаси ёки Давлат хизматлари марказлари орқали ариза топширишлари мумкин.
Ариза ва ҳужжатлар 15 июлдан 6 августгача кўриб чиқилади, шундан сўнг ўқишни кўчириш тўғрисидаги аризани қабул қилиш ёки рад этиш тўғрисида қарор қабул қилинади.
Ҳужжатларни тўлиқ тақдим этмаслик, нотўғри маълумотлар киритиш ёки белгиланган йиғимни ўз вақтида тўламаслик аризани рад этиш учун асос бўлади. Қабул қилиш ёки рад этиш тўғрисидаги қарор талабага электрон платформалар орқали юборилади.
Ҳужжат Қонун ҳужжатлари маълумотлари миллий базасида эълон қилинган ва 12.06.2026 йилдан кучга кирди.
Лола Абдуазимова
