Тиббий хизматлар сифати ва тиббиёт муассасаларини лицензиялаш тизимига қўйиладиган талаблар кучайтирилмоқда. Тегишли чора-тадбирлар Президентнинг 05.05.2026 йилдаги "Тиббиёт соҳасида кўрсатилаётган хизматлар сифатини ошириш бўйича қўшимча чора-тадбирлар тўғрисида"ги ПҚ-170-сон қарорида назарда тутилган.
Ҳужжатда 2030 йилга қадар 3 мингдан ортиқ давлат тиббиёт муассасаларини босқичма-босқич лицензия талабларига мослаштириш, шунингдек, давлат ва хусусий клиникалар учун ягона стандартларни жорий этиш кўзда тутилган.
2026 йил 1 июлдан бошлаб Соғлиқни сақлаш вазирлиги номидан лицензия бериш билан Тиббиёт ташкилотларини лицензиялаш ва аккредитация қилиш маркази шуғулланади. Хизматлар сифати ва лицензия талабларига риоя этилишини назорат қилиш ахборот тизимлари орқали масофадан амалга оширилади.
Бундан ташқари, тиббиёт ташкилотларини текшириш "Ягона давлат назорати" тизимида рўйхатдан ўтказилади, бизнес-омбудсман эса текширув бошлангани ҳақида 24 соат ичида хабардор қилиниши керак.
Давлат тиббиёт муассасалари учун мажбурий лицензиялаш муддатлари белгиланди: республика даражасидаги муассасалар 2027 йил 1 апрелгача, ҳудудий муассасалар 2028 йил охиригача, туман ва шаҳар тиббиёт муассасалари эса 2030 йил охиригача лицензия олишлари шарт.
Бундан ташқари, барча тиббиёт ташкилотларининг ахборот тизимларига қўйиладиган ягона талабларни тасдиқлаш ва тиббий хизматлар сифатини ошириш бўйича комплекс чора-тадбирларни амалга ошириш режалаштирилган.
Ҳужжат Қонун ҳужжатлари маълумотлари миллий базасида эълон қилинган ва 07.05.2026 йилдан кучга кирди.
Лола Абдуазимова
