Жиноят кодексига бир қатор тузатишлар киритилди (25.06.2020 йилдаги ЎРҚ-658-сон Қонунга қаранг).
Аввало, телекоммуникация ёки Интернет тармоқларида туҳмат ёки ҳақорат қилувчи материаллар жойлаштирилганлиги учун ҳам ЖКнинг 139-моддаси 2-қисми ва 140-моддаси 2-қисми бўйича жавобгарлик белгиланади.
Бундай жиноятларнинг алоҳида таркиби учун назарда тутилган жавобгарлик чораларига ҳам ўзгартиришлар киритилди:
а) ЖКнинг 139-моддаси 2 ва 3-қисмлари, шунингдек ЖКнинг 140-моддаси 3-қисми санкциясидан озодликдан маҳрум қилиш кўринишидаги жазо чораси чиқариб ташланди. Яъни энди туҳмат ва ҳақорат қилиш ҳолатларида ушбу жазо умуман қўлланилмайди;
б) ЖКнинг 139-моддаси 3-қисми санкциясига озодликни чеклаш (1 йилдан 3 йилгача, таҳр. изоҳи) жазосининг муқобили сифатида 300 БҲМдан 500 БҲМгача жарима ҳамда 360 соатдан 400 соатгача мажбурий жамоат ишлари белгиланган жазо чораси ҳам киритилди.
Эслатиб ўтамиз, бунда қуйидаги ҳолатлар ҳақида сўз юритилмоқда:
- оғир ёки ўта оғир жиноят содир этишда айблаб туҳмат қилиш;
- туҳмат оғир оқибатлар келиб чиқишига сабаб бўлган ҳолда;
- хавфли рецидивист томонидан туҳмат қилиш;
- туҳмат ғаразгўйлик ёки бошқа паст ниятларда қилинса.
Маълумот учун:
- туҳмат қилиш – била туриб бошқа шахсни шарманда қиладиган уйдирмалар тарқатиш;
- ҳақорат қилиш – шахснинг шаъни ва қадр-қимматини беодоблик билан қасддан таҳқирлаш.
Ҳужжат Қонун ҳужжатлари маълумотлари миллий базасида эълон қилинган ва 26.12.2020 йилдан кучга кирди.
Олег Заманов.
