Йўлларни қуриш ва улардан фойдаланиш соҳасида энг яхши хорижий тажрибани жорий этадилар. Давлат-хусусий шериклик салоҳиятини фаол қўллаш режалаштирилмоқда. Бу Президентнинг 27.11.2018 йилдаги ПҚ–4035-сон қарорида назарда тутилган.
2018–2019 йилларда йўл қурилиши соҳасига илғор хорижий услубларни жорий этиш бўйича «Йўл харитаси» тасдиқланди, декабрь ойида эса узоқ муддатли истиқболда соҳани ривожлантириш стратегияси ишлаб чиқилади. Ушбу лойиҳаларни амалга оширишда Германия тажрибасини ўрганиш ва қўллашга алоҳида эътибор берилади.
Умумий фойдаланишдаги автомобиль йўлларини ва ҳудудий автомобиль йўлларини лойиҳалаш, қуриш, реконструкция қилиш ва мукаммал таъмирлаш соҳасида давлат-хусусий шериклик тамойилларини жорий этиш режалаштирилмоқда.
Кадрлар масаласи эътибор марказида. Тошкент автомобиль йўлларини лойиҳалаш, қуриш ва эксплуатацияси институти ҳузурида соҳа мутахассисларининг малакасини ошириш ва қайта тайёрлаш маркази ташкил этилади. Ўқув жараёни хорижий мутахассисларни жалб этган ҳолда ташкил этилади. Бундан ташқари, йўл хўжалигидаги маҳаллий мутахассисларнинг хорижда малака ошириш ва тайёрлов ўқув курсларини, шунингдек Германиянинг етакчи йўл-қурилиш компанияларида амалиёт ўташларига кўмак берилади.
Ҳужжат Қонун ҳужжатлари маълумотлари миллий базасида эълон қилинган ва 29.11.2018 йилдан кучга кирди.
Олег Гаевой.
