Хавфли ишлаб чиқариш объектларида саноат хавфсизлиги таъминланади

«Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонуни лойихаси Вазирлар Маҳкамасининг 2017 йил 28 мартдаги 160-сон  «2017 йилда қонун лойиҳаларини ишлаб чиқиш ва Ўзбекистон Республикаси Олий Мажлисининг Қонунчилик палатасига киритиш дастурини тасдиқлаш тўғрисида»ги қарори ва Олий Мажлис Сенатининг 2016 йил 13 декабрдаги СҚ-132- III -сон қарорига асосан келишилган ҳолда ҳамда чет эл тажрибаси инобатга олиниб ишлаб чиқилган.

Аввало, ушбу қонун лойиҳасини қабул қилиш зарурати қуйидагиларга асосланган:

биринчидан, хавфли ишлаб чиқариш объектларида саноат хавфсизлиги талабларини бажаришни таъминлаш;

иккинчидан, хавфли ишлаб чиқариш объектларидан фойдаланилаётган ташкилотларнинг раҳбарлари ва масъул мутахассисларининг жавобгарлигини ошириш;

учинчидан, хавфли ишлаб чиқариш объектларида бахтсиз ҳодисалар ва аварияларни олдини олиш.

Мазкур Қонун лойиҳаси 2017 йилнинг 7 мартида жамоатчилик муҳокамаси учун Давлат инспекциясининг веб-сайтида ва Интерактив давлат хизматлари ягона порталида жойлаштирилган.

Энди батафсил айтганда, қонун лойиҳасида қуйидагилар назарда тутилмоқда:

1. Хавфли ишлаб чиқариш объектларидан фойдаланаётган ташкилотларнинг раҳбарлари ва масъул мутахассислари жавобгарлигини ошириш мақсадида жарималар миқдорининг оширилиши бўйича Маъмурий жавобгарлик тўғрисидаги кодекснинг 97-моддасига ўзгартишлар киритиш;   

2. Вазирлар Маҳкамаси томонидан хавфли ишлаб чиқариш объектларини ҳисобга олиш ва давлат реестрини юритиш тартибини белгилаш юзасидан Ўзбекистон Республикасининг “Хавфли ишлаб чиқариш объектларининг саноат хавфсизлиги тўғрисида”ги Қонуни 5-моддасига қўшимча қиритиш;

3. Қуйидаги қисмда Ўзбекистон Республикасининг “Хавфли ишлаб чиқариш объектларининг саноат хавфсизлиги тўғрисида”ги Қонуни 18-моддасига қўшимчалар киритиш:

• саноат хавфсизлиги талабларига риоя этилиши устидан ишлаб чиқариш назоратини олиб бориш  тартибининг Вазирлар Маҳкамаси томонидан белгиланиши;
• белгиланган саноат хавфсизлиги талабларига риоя этилиши устидан  ишлаб чиқариш назоратини амалга оширишни таъминлаш бўйича иш берувчиларнинг жавобгарлигини аниқлаш.

Фикримизча, таклиф қилинаётган Қонун лойиҳасининг қабул қилиниши:

• хавфли ишлаб чиқариш объектларида саноат хавфсизлиги талабларини бажаришни таъминлаш;
• хавфли ишлаб чиқариш объектларидан фойдаланилаётган ташкилотларнинг раҳбарлари ва масъул мутахассисларининг жавобгарлигини ошириш;
• хавфли ишлаб чиқариш объектларида бахтсиз ҳодисалар ва аварияларни олдини олишни таъминлашга хизмат қилади.
  

Қутлимурот БАБАШЕВ,

Олий Мажлис Қонунчилик палатаси депутати,

ЎзЛиДеП фракцияси аъзоси.