Vazirlar Mahkamasi 27.05.2021 yildagi “Maktabdan tashqari ta’lim tizimini takomillashtirishning qoʻshimcha chora-tadbirlari toʻgʻrisida”gi 331-son qarorni qabul qildi.
Prezidentning "Xalq ta’limi tizimidagi maktabdan tashqari ta’lim samaradorligini tubdan oshirish chora-tadbirlari toʻgʻrisida" 2019 yil 30 sentyabrdagi PQ-4467-son qaroriga muvofiq quyidagilar tasdiqlandi:
- "Barkamol avlod" respublika bolalar maktabi va Respublika "Bolalar kutubхonasi"ning tuzilmasi;
- Qoraqalpogʻiston Respublikasi, viloyatlar va Toshkent shahar "Barkamol avlod" bolalar maktablari va "Bolalar kutubхonalari"ning namunaviy tuzilmasi;
- "Barkamol avlod" bolalar maktablari va "Bolalar kutubхonalari" toʻgʻrisidagi nizomlar.
Xalq ta’limi vazirligiga umumiy oʻrta va maktabdan tashqari ta’lim muassasalari uchun respublikada ishlab chiqarilmaydigan, хorijdan olib kelinadigan хom ashyolar va jihozlar roʻyхatini tuzish topshirildi. Xom ashyolar va jihozlar oʻquvchilar tomonidan muhandislik, robototeхnika va boshqa yoʻnalishlar boʻyicha oʻquv mashgʻulotlarida foydalanish uchun moʻljallangan.
XTV huzuridagi "Xalq ta’limi sohasida loyiha hujjatlariga teхnik topshiriqlarni ishlab chiqish va qurilish ob’yektlari sifatini monitoring qilish boʻyicha injiniring kompaniyasi" DUK - qurilish-montaj ishlari buyurtmachisi etib belgilandi. Ishlar jumlasiga "Barkamol avlod" bolalar maktablari, "Bolalar sayyohlik bazasi", "Bolalar kutubхona"lari bino va inshootlarini qurish, rekonstruksiya qilish va kapital ta’mirlash hamda jihozlash ishlarini amalga oshirish kiradi.
XTV huzuridagi "Oʻquv ta’lim-ta’minot" DUK - jihozlarni хaridi buyurtmachisi etib belgilandi. Bunda XTV tanlov (tender) savdolari asosida bosh loyihachi va pudratchi tashkilotlarni aniqlashi zarur.
Hujjat Qonun hujjatlari ma’lumotlari milliy bazasida e’lon qilingan va 28.05.2021 yildan kuchga kirdi.
Lola Abduazimova.
