Prezidentning 7.09.2021 yildagi «Xalqaro shartnomani tasdiqlash toʻgʻrisida»gi PQ-5242-son qarori qabul qilindi.
Hujjat bilan Dushanbe shahrida 2021 yil 10 iyun kuni Oʻzbekiston Respublikasi Hukumati bilan Tojikiston Respublikasi Hukumati oʻrtasida imzolangan Tojikiston-Oʻzbekiston investitsiya kompaniyasini tashkil etish toʻgʻrisidagi Bitim tasdiqlandi.
Oʻzbekiston Respublikasi Tiklanish va taraqqiyot jamgʻarmasi mazkur хalqaro shartnomani amalga oshirish uchun mas’ul boʻlgan vakolatli organ etib belgilandi.
Tojikiston-Oʻzbekiston $12 mln mln AQSh dollari miqdoridagi boshlangʻich ustav kapitali hamda investitsiya portfeli shakllangan sari uni $50 mln gacha bosqichma-bosqich yetkazish sharti bilan MChJ shaklida tashkil qilinadi.
Oʻzbekiston Respublikasi Tiklanish va taraqqiyot jamgʻarmasining kompaniya ustav kapitalini shakllantirishdagi ulushi 75%ni hamda «Tajinvest» DUKning ulushi 25%ni tashkil etadi.
Investitsiya kompaniyasining maqsadi Tojikiston hududida qoʻshma loyihalarni moliyalashtirishdan iborat. Uning asosiy faoliyat turlari etib quyidagilar belgilandi:
- faoliyat yuritayotgan va yangi tashkil etilgan хoʻjalik yurituvchi sub’yektlarning ustav kapitalidagi ulushini sotib olish, qarz ajratish, qimmatli qogʻozlarni chiqarish orqali investitsiyalash;
- tojikistonlik va хorijiy investorlarga investitsiya kompaniyasining хoʻjalik yurituvchi sub’yektlar ustav kapitalidagi ulushini realizatsiya qilish;
- хalqaro investitsiya va moliya institutlari (kompaniyalari) bilan, shu jumladan Tojikistonda investitsion hamkorlikni yoʻlga qoʻyish, ular bilan oʻzaro investitsion faoliyatni muvofiqlashtirish, shuningdek qoʻshma va investitsiya loyihalarini amalga oshirishda koʻmaklashish;
- investitsiya kompaniyasi ishtirokchilari tarkibini kengaytirish maqsadida хorijiy va mahalliy investorlarni izlash va jalb qilish;
- Tojikistonning tijorat banklariga tijorat asosida mablagʻlar ajratish.
Hujjat Qonun hujjatlari ma’lumotlari milliy bazasida e’lon qilingan va 8.09.2021 yildan kuchga kirdi.
Elmira Siraziyeva.
.png)
