Вазирлар Маҳкамасининг 16.02.2022 йилдаги “Ҳоким ёрдамчилари фаолиятини қўллаб-қувватлаш жамғармасини ташкил этиш тўғрисида”ги 72-сон қарори қабул қилинди.
Ҳужжат Президентнинг “Маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича ҳоким ёрдамчилари фаолиятини ташкил этиш чора-тадбирлари тўғрисида” 2021 йил 3 декабрдаги ПҚ–31-сон қарори ижросини таъминлаш мақсадида қабул қилинди.
Юқорида кўрсатилган қарорга мувофиқ, ҳоким ёрдамчилари фаолиятини қўллаб-қувватлаш жамғармаси ташкил этилди.
Ҳужжат билан ҳоким ёрдамчилари фаолиятини қўллаб-қувватлаш жамғармаси тўғрисидаги низом тасдиқланди. У қуйидагилардан иборат:
- Жамғарма фаолиятининг умумий қоидалари. Жамғарма юридик шахс ташкил этмаган ҳолда шакллантирилади ва Молия вазирлигининг Ғазначилигида шахсий ғазна ҳисобварағи очилади;
- Жамғарма фаолиятини бошқариш тартиби. Жамғарма фаолияти Кузатув кенгаши томонидан бошқарилади ва унинг аъзолари ўз фаолиятини жамоатчилик асосида амалга оширади;
- Жамғарма маблағларини шакллантириш манбалари. Булар:
- Президентнинг фармон ва қарорлари, Ҳукуматнинг қарорлари билан ажратиладиган маблағлар;
- хорижий (халқаро) молия институтлари ва бошқа хорижий ташкилотларнинг техник кўмак маблағлари ва грантлари;
- жисмоний ва юридик шахсларнинг ҳомийлик хайриялари;
- вақтинча бўш маблағларни тижорат банкларининг депозитларига жойлаштиришдан олинган даромадлар;
- қонун ҳужжатларида тақиқланмаган бошқа манбалар.
- Жамғарма маблағлари ҳисобидан молиялаштириладиган асосий йўналишлар. Уларга қуйидагилар киради:
- бошқа ҳудудлардан келиб ишлаётган ҳоким ёрдамчилари ва республика вакиллари учун турар жой ижараси харажатлари учун компенсация тўлаш;
- иш фаолиятида яхши натижаларга эришган ҳоким ёрдамчилари ва республика вакилларини ҳар ойда мукофотлаш;
- ўз шахсий автомобилидан фойдаланаётган республика вакилларининг транспорт харажатларини компенсация қилиш;
- республика вакилларининг бир ойда бир марта доимий яшаш жойига темир йўл транспортида бориб келиши учун компенсация тўлаш;
- ҳоким ёрдамчилари фаолиятини самарали ташкил этишга компьютерлар, планшетлар, мультимедиа ва тармоқ қурилмалари ҳамда дастурий таъминотларни харид қилиш ва бошқалар.
Ҳужжат билан Ҳоким ёрдамчилари фаолиятини қўллаб-қувватлаш жамғармаси кузатув кенгашининг таркиби ҳам тасдиқланди.
Ҳужжат Қонун ҳужжатлари маълумотлари миллий базасида эълон қилинган ва 17.02.2022 йилдан кучга кирди.
Саодат Усманова.
