Вазирлар Маҳкамасининг 22.03.2018 йилдаги «Давлат активларини сотишда ва ижарага беришда электрон савдоларни жорий этиш чора-тадбирлари тўғрисида»ги 209-сон қарори эълон қилинди.
Ҳукумат Тошкент вилоятида махсус эксперимент ўтказишга қарор қилди. Бу ерда давлат мулкини фақат «E-IJRO AUKSION» электрон майдончасидаги онлайн-аукцион орқали сотиб олиш ёки ижарага олиш мумкин бўлади.
Бундай тартибот қуйидаги пайтдан қўлланила бошлайди:
- 2018 йил 10 майдан бошлаб – хусусийлаштириладиган (шу жумладан «ноль» харид қиймати бўйича, инвестиция ва ижтимоий мажбуриятларни қабул қилиш шарти билан) давлат кўчмас мулк объектлари, шунингдек масъулияти чекланган жамиятларнинг устав фондларидаги (устав капиталларидаги) давлат улушлари сотилганда;
- 2018 йил 1 июлдан бошлаб – давлат мулки ижарага берилганда.
Савдоларга қўйиш билан боғлиқ барча турдаги рўйхатдан ўтказиш ва рухсат бериш тартиботларидан ўтган объектлар аукционга қўйилади. Бунда мол-мулк қийматининг ёки йиллик ижара тўловининг 1%и миқдоридаги савдолар ташкилотчиси хизматларига ҳақни сотувчилар ёки ижарага берувчиларнинг ўзи тўлайдилар.
Давлат рақобат қўмитаси ҳамда Ахборот технологиялари ва коммуникацияларини ривожлантириш вазирлиги савдоларни тартибга солувчи Низом лойиҳасини бир ой муддатда ишлаб чиқиб, ҳужжатни тасдиқлаш учун Вазирлар Маҳкамасига киритадилар.
Бу – муҳим! Эркин иқтисодий ва кичик саноат зоналари ҳудудларидаги давлат активларини сотиш ва ижарага бериш тегишли норматив-ҳуқуқий ҳужжатларда белгиланадиган тартибда амалга оширилади.
Ҳужжат Қонун ҳужжатлари маълумотлари миллий базасида эълон қилинган ва 26.03.2018 йилдан кучга кирди.
Мазкур ҳужжатнинг тўлиқ матни, шарҳлар ва у билан боғлиқ бошқа қонун ҳужжатларига ҳаволалар билан «Ўзбекистон Республикаси қонун ҳужжатлари» ахборот-қидирув тизимида танишиш мумкин.
Самир Латипов.
