Молия вазирлиги, Иқтисодиёт вазирлиги ва ДСҚнинг қарори (5.04.2018 йилда 1502-3-сон билан рўйхатдан ўтказилган) билан Янги ташкил этилган микрофирма ва кичик корхоналарга ягона солиқ тўловини тўлаш муддатини кечиктириш ҳуқуқини бериш тартиби тўғрисидаги низомга ўзгартиришлар киритилди.
Эслатиб ўтамиз, Низом билан янги ташкил этилган микрофирма ва кичик корхоналарга ЯСТни тўлаш муддатини кечиктириш ҳуқуқини бериш тартиби белгиланган. Бироқ у қуйидагиларга татбиқ этилмайди:
- савдо ва умумий овқатланиш корхоналарига;
- лотереяларни ташкил этиш фаолиятини амалга ошириш доирасида юридик шахсларга;
- илгари фаолият юритган юридик шахслар базасида ташкил этилган корхоналарга;
- башарти улар ана шу корхоналардан ижарага олинган ускуналарда ишлаётган бўлсалар, бошқа корхоналар ҳузурида ташкил этилган корхоналарга.
Қабул қилинган қарор билан солиқ мажбурияти бўйича тўлов муддатини кечиктириш ҳуқуқи солиқ таътиллари кўринишида берилади. Бу ЯСТ тўлови улар давлат рўйхатидан ўтказилган пайтдан бошлаб 1 йилгача бўлган муддатга кўчирилишини англатади. Илгари ушбу муддат белгиланмаган эди.
Корхона тўлов муддатини кечиктириш ҳуқуқини бериш тўғрисидаги ариза билан ўзи солиқ ҳисобига қўйилган жойдаги давлат солиқ хизмати органига (ДСИ, ДСБ) мурожаат қилиши шарт. Илгари ариза топшириладиган жой тегишли туман (шаҳар) давлат солиқ инспекцияси деб кўрсатилган эди.
Солиқ таътиллари тўғрисидаги аризани энди нафақат ёзма, балки электрон шаклда ҳам солиқ тўловчининг шахсий кабинети орқали, шу жумладан ахборот тизимлари воситасида бериш мумкин.
Шунингдек қарорда тўлов муддатининг кечиктирилиши билан боғлиқ, ҳисобланган ягона солиқ тўлови суммаси дебети бўйича акс эттириладиган счётнинг номи ҳам аниқлаштирилди:
- 9820-«Фойдадан ҳисобланган бошқа солиқлар ва бошқа мажбурий тўловлар бўйича харажатлар» счётининг дебети;
- 6410-«Бюджетга тўловлар бўйича қарз (турлари бўйича)» счётининг кредити.
Ҳужжат Қонун ҳужжатлари маълумотлари миллий базасида эълон қилинган ва 5.04.2018 йилдан кучга кирди.
Мазкур ҳужжатнинг тўлиқ матни, шарҳлар ва у билан боғлиқ бошқа қонун ҳужжатларига ҳаволалар билан «Ўзбекистон Республикаси қонун ҳужжатлари» ахборот-қидирув тизимида танишиш мумкин.
Татьяна Белоусова.
