Президентнинг 18.03.2019 йилдаги «Эшитиш ва нутқида муаммоси бўлган шахсларни ижтимоий қўллаб-қувватлашга оид қўшимча чора-тадбирлар тўғрисида»ги ПҚ–4242-сон қарори қабул қилинди. Инновацион ривожланиш вазирлиги шу ҳақда хабар берди, ҳужжат унинг ташаббуси билан ишлаб чиқилган.
2019 йил 1 июлдан ФВВ таркибида Эшитиш ва нутқида муаммоси бўлган шахсларни ижтимоий қўллаб-қувватлаш диспетчерлик хизмати ташкил этилади. Унинг асосий вазифаси – бундай шахслар, шунингдек уларнинг вакиллари томонидан техник воситалар (видеоқўнғироқлар, матнли хабарлар, махсус дастурий таъминотдан фойдаланган ҳолда қўнғироқлар ва б.) орқали бўладиган мурожаатларга шошилинч оператив хизматларнинг (101, 102, 103, 104, 1050) кечаю кундуз, тезкор жавоб беришларини таъминлаш.
Кўрсатилган санага қадар мазкур шахсларга шошилинч оператив хизматлар билан ўзаро ҳамкорлик қилиш, шу жумладан мобил алоқа сервисларидан фойдаланиш бўйича бепул хизмат кўрсатиш имконини берувчи ахборот тизими жорий этилади.
