Президент Қурбон ҳайитини нишонлаш тўғрисидаги қарорни имзолади. Ҳужжат ЎзАда эълон қилинган.
2019 йилда Қурбон ҳайитининг биринчи куни 11 август – якшанба кунига тўғри келади, дейилади ҳужжатда. Ушбу байрам маънавий ҳаётимизда улкан ўринга ва аҳамиятга эга бўлиб, халқимизга хос бўлган меҳр-оқибат, шукроналик ва бағрикенглик рамзи ҳисобланади.
Миллий-диний қадриятларимизни асраш ва улуғлаш мақсадида Қорақалпоғистон Вазирлар Кенгаши, вилоятлар ва Тошкент шаҳар ҳокимликларига “Нуроний” жамғармаси, Фуқароларнинг ўзини ўзи бошқариш органлари фаолиятини мувофиқлаштириш бўйича Республика кенгаши ва бошқа жамоат ташкилотлари билан биргаликда Қурбон ҳайитининг жойларда юқори савияда, халқимизнинг миллий ва диний анъаналарига мос равишда ўтиши учун тегишли тадбирларни амалга ошириш топширилди.
