Вазирлар Маҳкамасининг 29.11.2021 йилдаги «Пойтахт банк» АЖ устав капиталидаги давлат акциялари пакетини сотиш ва ундан тушган маблағларни тақсимлаш тўғрисида»ги 719-сон қарори қабул қилинди.
Ҳужжатда таъкидланишича, 2018 йилда Тошкент шаҳар ҳокимлиги муассислигида ташкил этилган «Пойтахт банк» АЖ устав капиталини шакллантиришга маҳаллий бюджетнинг қўшимча манбалари ҳисобидан 100 млрд сўм ажратилган.
Белгиланишича:
- «Пойтахт банк» АЖ устав капиталидаги 100% давлат акциялари пакетини сотишдан тушган маблағлар Тошкент шаҳар маҳаллий бюджетига йўналтирилади;
- пойтахт маҳаллий бюджетига келиб тушган маблағлар Молия вазирлиги томонидан ажратилган бюджет ссудаларини, шунингдек Тикланиш ва тараққиёт жамғармаси ҳамда тижорат банклари томонидан ажратилган кредитларни қайтаришга йўналтирилади;
- «Пойтахт банк» давлат акциялари пакетини сотиш бўйича олди-сотди битими қимматли қоғозларнинг уюшган савдосидан ташқарида амалга оширилади.
Давлат мулкини сотиш бўйича тендер савдоларини ўтказувчи давлат комиссияси томонидан давлат улушини инвесторларга сотиш Deloitte халқаро консультантларини жалб этган ҳолда оммавий савдолар орқали амалга оширилади.
Ҳужжат Қонун ҳужжатлари маълумотлари миллий базасида эълон қилинган ва 29.11.2021 йилдан кучга кирди.
Лола Абдуазимова.
