Навоий давлат кончилик институти Навоий давлат кончилик ва технологиялар университети этиб қайта ташкил этилди

Университет фаолиятининг асосий йўналишлари этиб қуйидагилар белгиланди:

• саноат, техника-технология, муҳандислик соҳалари учун олий маълумотли мутахассислар ва илмий-педагогик кадрларни тайёрлаш, қайта тайёрлаш ҳамда уларнинг малакасини ошириш;
• етакчи хорижий олий таълим муассасалари билан қўшма таълим дастурлари ва илмий лойиҳаларни амалга ошириш;
• замонавий ўқув ва илмий лаборатория базасини шакллантириш;
• саноат ташкилотларининг муаммоларини ечишга қаратилган илмий, амалий ва инновацион тадқиқотларни ривожлантириш.

Ҳужжат билан Университет ҳузурида қуйидагилар ташкил этилди:

• Навоий давлат кончилик институтининг Нукус филиали негизида - Нукус кончилик институти;
• "Навоий" илмий-технология саноат парки;
• Навоий давлат педагогика институти ҳузуридаги Кармана хизмат кўрсатиш ва сервис техникуми негизида — Кармана политехника техникуми;
• "Ўзсаноатқурилишматериаллари" уюшмаси тизимидаги Нурота саноат-кончилик коллежи негизида - Ғозғон политехника техникуми.

Навоий давлат кончилик институти ҳузуридаги Учқудуқ саноат техникуми ва Зарафшон саноат техникуми Университет ҳузурига ўтказилди.

Университет фаолиятини мувофиқлаштириш бўйича бошқарув кенгашининг таркиби тасдиқланди. Унга Университетнинг яқин, ўрта ва узоқ муддатга мўлжалланган ривожлантириш дастурини, молиявий йил учун мўлжалланган бизнес-режасини, даромад ва харажатлар параметрларини тасдиқлаш ҳамда уларнинг ижросини назорат қилиш вазифалари юклатилди.

Шунингдек ҳужжат билан қуйидагилар тасдиқланди:

• Навоий давлат кончилик ва технологиялар университети фаолиятини йўлга қўйиш ва уни 2026 йилга қадар комплекс ривожлантириш дастури;
• Навоий давлат кончилик ва технологиялар университетини 2026 йилга қадар ривожлантиришнинг мақсадли кўрсаткичлари;
• Навоий давлат кончилик ва технологиялар университетида ташкил этиладиган бакалавриат таълим йўналишлари ва магистратура мутахассисликлари рўйхати;
• Навоий давлат кончилик ва технологиялар университетининг бакалавриат таълим йўналишлари ва магистратура мутахассисликларини амалиёт ўташ объектлари бўйича илмий-тадқиқот муассасалари, тармоқ корхоналари ва ташкилотларга бириктириш жадвали.

Ҳужжат Қонун ҳужжатлари маълумотлари миллий базасида эълон қилинган ва 01.04.2022 йилдан кучга кирди.

Лола Абдуазимова.