Вазирлар Маҳкамасининг 04.07.2022 йилдаги “Ўзбекистон Республикаси оила ва хотин-қизлар давлат қўмитаси фаолиятини тартибга солиш соҳасидаги норматив-ҳуқуқий ҳужжатларни тасдиқлаш тўғрисида”ги 358-сон қарори қабул қилинди.
Ҳужжат билан қуйидагилар тасдиқланди:
- Оила ва хотин-қизлар давлат қўмитаси тўғрисидаги низом (1);
- Ўзбекистон Республикаси Оила ва хотин-қизлар давлат қўмитасини ривожлантириш ва ходимларини моддий рағбатлантириш жамғармаси тўғрисидаги низом (2).
Низом (1) қуйидагиларни белгилайди:
- Қўмитанинг мақоми, асосий вазифалари ва функциялари. Қўмитанинг асосий вазифалари қуйидагилар ҳисобланади:
- хотин-қизларнинг ҳуқуқ ва қонуний манфаатларини ҳимоя қилиш, уларнинг мамлакат ижтимоий-сиёсий ҳаётидаги ўрни ва фаоллигини ошириш, гендер тенглик кафолатларини таъминлаш, уларни илмий фаолиятга кенг жалб қилиш;
- оғир ижтимоий аҳволга тушиб қолган хотин-қизларга ижтимоий-психологик ёрдам кўрсатиш;
- хотин-қизларни хусусий тадбиркорликка, ҳунармандчиликка кенг жалб этиш ва бошқалар;
- Қўмитанинг ҳуқуқлари ҳамда жавобгарлиги, шунингдек, унинг фаолиятини ташкил этиш тартиби;
- Қўмита раҳбариятининг асосий функционал вазифалари ва жавобгарлиги;
- Қўмита фаолиятини молиялаштириш, унинг ходимлари меҳнатига ҳақ тўлаш, моддий рағбатлантириш ва ижтимоий ҳимоя қилиш тартиби.
Қўмита қуйидаги ҳуқуқларга эга:
- Вазирлар Маҳкамасига ёки Президенти Администрациясига норматив-ҳуқуқий ҳужжатлар лойиҳаларини киритиш;
- ўз вазифаларни амалга ошириш учун, давлат органлари ҳамда бошқа ташкилотларнинг раҳбарлари ва мутахассисларини жалб қилиш;
- давлат органлари. илмий муассасалар ва бошқа ташкилотлардан зарур материаллар ва маълумотларни олиш;
- хотин-қизлар ҳуқуқлари ва қонуний манфаатларини кўзлаб судларга ариза киритиш;
- Қўмитага юклатилган хотин-қизлар ҳуқуқлари ва қонуний манфаатларини ҳимоя қилиш соҳасидаги вазифалар ва функцияларини таъминлаш ва бошқалар;
Юридик шахс ташкил этмасдан Ўзбекистон Республикаси Оила ва хотин-қизлар давлат қўмитасини ривожлантириш ва ходимларини моддий рағбатлантириш жамғармаси ташкил этилди. Унинг даромадлари қуйидагилар ҳисобидан шакллантирилади:
- 2022 йилда - Давлат бюджетидан давлат мақсадли жамғармасига ажратилиши лозим бўлган маблағларнинг 12 фоизини ҳамда «Обод ва хавфсиз маҳалла» жамғармасига ажратилиши лозим бўлган маблағлардан 3 миллиард сўм йўналтириш ҳисобига;
- 2023 йилда - Давлат бюджети параметрларида Жамғарма учун 15 млрд сўмдан кам бўлмаган миқдорда маблағ ажратиш назарда тутилади.
Ҳужжат Қонун ҳужжатлари маълумотлари миллий базасида эълон қилинган ва 05.07.2022 йилдан кучга кирди.
Саодат Усманова.