Президент томонидан 29.04.2023 йилдаги “Давлат қарзи тўғрисида”ги ЎРҚ-836-сон Қонун имзоланди.
Ҳужжат давлат қарзи ва уни бошқариш билан боғлиқ муносабатларни тартибга солишга қаратилган.
Маълумот учун: давлат қарзи – Ўзбекистон Республикасининг ички маблағи ва хориждан маблағ жалб қилиш натижасида юзага келган мажбуриятлари;
қарз берувчи – қарз шартномаси буйича активлар берган ёки активлар бериш ниятида бўлган Ўзбекистон Республикаси резиденти ёки норезиденти (чет давлатлар, халқаро ташкилотлар, халқаро молия институтлари ва иқтисодий институтлар, чет эл ҳукуматларининг молия ташкилотлари, чет эл инвесторлари ва Ўзбекистон Республикасининг бошқа норезидентлари).
Қонун билан давлат қарзини бошқариш соҳасида давлат органларининг ваколатлари белгиланмоқда.
Давлат қарзини бошқариш принципларидан бири сифатида очиқлик ва шаффофлик принципи белгиланган бўлиб, у давлат қарзини бошқариш тўғрисидаги ахборотни ОАВда эълон қилиш, ваколатли органнинг расмий веб-сайтига жойлаштириш ва янгилаб бориш, шунингдек Олий Мажлис палаталарига киритиш орқали таъминланади.
Маълумот учун: давлат қарзини бошқариш тўғрисидаги ахборот:
- давлат қарзини бошқариш стратегиясини ва унинг амалга оширилишини;
- давлат қарзининг миқдорини ва унинг ўзгаришини;
- давлат томонидан жалб қилиниши режалаштирилаётган маблағларни; давлат томонидан жалб қилинган маблағларни;
- давлат томонидан маблағ жалб қилиш бўйича шартномаларни;
- давлат томонидан жалб қилинган маблағлардан мақсадли фойдаланилиши ва уларнинг самарадорлиги ҳамда давлат қарзи бўйича хизмат кўрсатиш тўғрисидаги маълумотларни ўз ичига олади.
Давлат қарзи қисқа муддатли (бир йилгача бўлган муддатга), ўрта муддатли (бир йилдан беш йилгача) ва узоқ муддатли (беш йил ва ундан ортиқ муддатга), сўм ёки чет эл валюталарида бўлиши мумкин.
Давлат қарзининг миқдори ялпи ички маҳсулотнинг йиллик прогноз кўрсаткичига нисбатан 60%дан ошмаслиги керак.
Ҳужжат Қонунчилик маълумотлари миллий базасида эълон қилинган ва 02.08.2023 йилдан кучга киради.
Собир Нурбердиев.
